ஆங்கிலப் புத்தாண்டு அவசியமா?

நண்பர்களுக்கு வணக்கம்.

கடலூர், பாண்டிச்சேரி போன்ற கடலோர மாவட்டங்களில் வசிக்கும் மக்கள் தானே புயலின் கடுமையான தாக்கத்தால் மிகவும் துன்பத்திற்கு ஆளாகியுள்ளனர்.

மனிதன் என்னதான் வளர்ச்சி, விஞ்ஞானம் என்று வாய்கிழிய பேசினாலும், எழுதினாலும் அடிப்படையில் அவர்கள் இன்னும் ஆதிவாசிகளாகவே வாழ்ந்து வருகின்றனர் என்பதை சமீபத்திய புயல் பாதிப்புகள் நமக்கு உணர்த்தியுள்ளது.

ஒரு மனிதனின் அத்யாவசிய தேவைகளில் மிகவும் முக்கியமானது தண்ணீர், மின்சாரம் போன்ற அடிப்படை தேவைகளுக்கு மனிதர்கள் படும் துன்பம் அதை எழுத்தில் வடிக்க முடியாதது.

இத்தகைய சோகம் சூழ்ந்திருக்கும் நிலையில் பலரும் ஆங்கிலப் புத்தாண்டை கொண்டாடி வருகின்றனர்.  அதிலும் தமிழ்கூறும் நல்லுலகம் நம் பண்பாட்டை, அடிப்படையை மறந்து ஆங்கில மோகத்தால் அறிவிழந்து  அறிவியல் அடிப்படைகளற்ற ஆங்கிலப் புத்தாண்டை தலையில் வைத்து கொண்டாடிவருவது மிகவும் வேதனைக்குரிய விஷயமாகும்.

காரணமில்லாமல் காரியமில்லை

நம் முன்னோர்கள், சித்தர்கள், தவமுனிகள் அறிவில் சிறந்தவர்கள்.  அவர்கள் எந்த ஒரு செயலையும் காரணமில்லாமல் செய்வதும் இல்லை மற்றவர்களுக்கு பின்பற்ற வழிகாட்டுவதுமில்லை.   அந்தவகையில் அவர்கள் கோள்களின் இயக்கத்தையும், வானில் கோள்கள் அமைந்துள்ள நிலைகளின் அடிப்படையிலும், வருடம், மாதம், நாள், கிழமை, வாரம், நட்சத்திரம், திதிகள், நேரம், மணி, ஓரை என்று ஒவ்வொன்றிற்கும் பெயர்களிட்டு அவர்கள் பின்பற்றி வந்தனர்.  பிற்காலத்தில் அவர்களின் வழித்தோன்றலான நாமும் அவற்றை பின்பற்றி வந்தோம்.

நம்மை நீண்ட காலம் ஆண்ட ஆங்கிலேயர்களின் தாக்கத்தால் நாம் இன்னமும் அவர்களின் வழிமுறைகளை பின்பற்றி வருவது நமக்கு சொந்த புத்தியில்லாததையே காட்டுகிறது.  அடிமை இரத்தம் நம்மை விட்டு இன்னும் விலகியபாடில்லை.

சித்திரை-1 என்றால் அது வான மண்டலத்தில் தலையாய கிரகமாகிய சூரியன் தனது உச்ச வீட்டில் தனது பயணத்தை தொடங்குகிறார் என்று பொருள் கொள்ளலாம்.

அல்லது நமது தலைவர் கலைஞர் சொல்வது போல தைத்திருநாளில் சூரியன் உத்திராயண புண்ய காலத்தில் தனது பயணத்தை துவங்குவதால் அதிலும் லாஜிக் இருக்கிறது.

உண்மையில் ஜனவரி-1 அன்று என்ன மாற்றம் நிகழ்கிறது? என்று யாராவது யோசித்து பார்த்ததுண்டா?

எந்த ஒரு லாஜிக்கும் இல்லாமல், அடிப்படையான காரணமும் இல்லாமல் கிரிகோரியன் என்ற அரசன் நிர்ணயித்தான் அதுவும் பிப்ரவரி மாதத்தில் அறிவித்தான் என்றும், இயேசு கிறிஸ்து டிசம்பர் மாதம் அவதரித்தார் என்றும் ரோமன், ஜுலியன் அது, இது என்று ஆளாளுக்கு ஒரு வழிமுறையை கடைபிடித்து கடைசியில் ஜனவரி 1-ம் தேதி வந்துவிட்டால் அது புத்தாண்டு என்று அமைத்துவிட்டு போய்விட்டனர்.

நாமும் அவர்களுக்கு அடிமைகளாக இருந்தமையால் அவர்களது பழக்க வழக்கங்களை விடாமல் அவர்களின் சார்பில் கொண்டாடி மகிழ்கிறோம்.  கொண்டாடுவது கூட தவறில்லை.  அன்று இந்துக் கோயில்களில் வழிபாடு என்று கூட்டம் நிரம்பி வழிகிறது.
 
நம் இந்திய வழக்கப்படி சூரிய உதயம் காலை 6 மணிக்கு தோராயமாக தொடங்குகிறது.  அது தான் நமக்கு பகல் பொழுது.  ஒவ்வொரு நாளும் நாம் பகலில் தானே விழிக்கிறோம். உண்கிறோம்.  இரவில் உறங்குவது தானே நமது பழக்கம்.

நிலைமை இப்படி இருக்கையில் நமக்கு நள்ளிரவு 12 மணிக்கு  கிரீன்விச்சில் பகல் பொழுது தொடங்கும் போது நம்மவர்கள் ஹேப்பி நியூ இயர் என்று நடு இரவில் கூச்சல் போடுவது எந்த அளவிற்கு நாம் விசுவாசமான அடிமைகளாக வாழ்ந்து வருகிறோம் என்பதையே காட்டுகிறது.

இப்போது கடைசியாக என்னதான் சொல்ல வருகிறாய் என்று கேட்பது புரிகிறது.

நாம் நமக்கான அடையாளங்களை இழக்காமல் இருப்பது தான் தமிழனுக்கு பெருமை.  அதைவிடுத்து அடுத்தவர்களுக்கு பல்லக்கு தூக்கிகளாக இருந்தோமானால் அதுவே நிரந்தரமானதாகிவிடும்.  பிறகு நாதியற்ற மனிதனாக, அடிமை வம்சத்து வழித்தோன்றலாக வாழ்ந்து மடிவது நம்மை செதுக்கிய, நமக்கு வாழ வழிகாட்டிய முன்னோர்களுக்கு நாம் தேடித்தரும் அவமானம்.

அய்யன் திருவள்ளுவர் கூறியது போல்

எப்பொருள் யார்யார்வாய்க் கேட்பினும் அப்பொருள்
மெய்ப்பொருள் காண்ப தறிவு.

என்ற குறளின் கருத்திற்கிணங்க நம் அறிவை கொண்டு ஆராய்ந்து தெளிந்து அறிவுள்ள மனிதனாக வாழ வேண்டுகிறேன்.

நன்றி.