உள்குத்துக்கும் உள்ளாட்சி தேர்தலுக்கும் என்ன சம்பந்தம்?..

ஒரு வழியாக உள்ளாட்சி தேர்தலுக்கான தேர்தல் அறிவிப்புகளும், கூட்டணிக் குழப்பங்களும் முடிவிற்கு வந்துவிட்டன.  7 முனைப்போட்டியாம்.  எந்த முனைக்கு வெற்றிவாய்ப்பு கிடைக்கும்? அலசுவோமா?

அரசியலில் நிரந்தர நண்பனும் கிடையாது நிரந்தர பகைவனும் கிடையாது என்றொரு அடைமொழி சொல்லப்படுவதுண்டு.  இது எதற்கென்றால் யார் வேண்டுமானாலும், யாருடன் வேண்டுமானாலும், எப்போது வேண்டுமானாலும் கொள்(ளை)கை அடிப்படையில் கூட்டணி அமைக்கத்தான்.

அந்த அடிப்படையில் தான் இதுவரையிலான தமிழக அரசியல் வரலாற்றில் கூட்டணிகள் அமைக்கப்பட்டு வந்திருக்கின்றன.  ஆனால் தமிழக அரசியல் வரலாற்றிலேயே முதல்முறையாக அரசியலுக்கு வந்து சில நாட்களே ஆன கட்சிகள் கூட தனித்து நின்று தேர்தலை சந்திக்க துணிந்திருக்கிறது என்றால் என்ன பொருள்? அவர்களுக்கு வேறு வழியில்லை.  மேலும்  நடக்க இருப்பது வெறும் உள்ளாட்சி தேர்தல் மட்டுமே இதில் நம் பலத்தை சோதித்துக்கொண்டால் வரக்கூடிய நாடாளுமன்ற தேர்தலுக்கு பெரிய கட்சிகளுடன் பேரம் பேசி தேவையான சீட்டுகளை பெற்றுக்கொள்ள வசதியாக இருக்கும் என்ற கணக்கு தான்.

நடந்து முடிந்த சட்டசபை தேர்தலில் ஏற்பட்ட ஜெயா, விஜயகாந்த் கூட்டணியால் யாருக்கு லாபம் என்று பார்ப்பதை விட கலைஞர் மீண்டும் ஜெயித்து வந்துவிடக்கூடாது என்பதில் இருவருமே ஒற்றுமையாக இருந்ததால் கூட்டணி அமைத்தார்கள்.

தொடர் தோல்விகளால் துவண்டிருந்த ஜெயாவிற்கு விஜயகாந்த் உடனான கூட்டணி ஒரு தெம்பை அளித்தது எனலாம்.  ஆனால் பதவிக்கு வந்தவுடன் இனி யாரும் நம்மை அசைக்க முடியாது என்ற எண்ணமும் (முன்பு பதவியில் இருந்தவர்களும் இப்படிதான் நம்பினார்கள் பாவம் அவர்களின் நம்பிக்கை பொய்க்க கூடாது), நாமே விஜயகாந்தை மேலும் மேலும் வளர்த்து பெரிய ஆளாக்கிவிடக் கூடாது என்ற அரசியல் சாதுர்யமுமே ஜெயா தனித்து நிற்க காரணமாக இருந்திருக்கிறது.

எதிர்முகாமில் திமுக, காங்கிரஸ் கூட்டணிகள் உடைந்துவிட்டது என்பதைவிட கலைஞரின் அரசியல் சாதுர்யத்தால் காங்கிரசை சாயம் வெளுக்க வைக்க இது தான் சரியான சந்தர்ப்பம் என நினைத்தும், கனிமொழி கைதுக்கு அவர் மனதில் இருந்த நெருடலுக்கு ஆறுதலும் தேடிக்கொண்டுள்ளார்.  தோல்விகள் கலைஞருக்கு புதிதல்ல.  மேலும் இப்போது இருக்கின்ற நிலையில் அவர்களால் உடனடியாக மீண்டெழ முடியாத நிலை. இதுவே நாடாளுமன்ற தேர்தலாக இருக்கும்பட்சத்தில் இவ்வாறு கழற்றிவிட முயன்றிருப்பாரா என்பது யோசிக்க வேண்டிய விஷயம்.

கம்யூனிஸ்ட்கள் கிடைத்தவரை லாபம் என நினைத்து விஜயகாந்த் உடன் கூட்டணி வைத்திருக்கிறார்கள்.  விஜயகாந்த் இந்த வாய்ப்பை சரியாக பயன்படுத்திக் கொள்வதுடன் இனி வரும் தேர்தலில் இதே வழிமுறையை கையாண்டால் நிச்சயம் தமிழகத்தில் ஒரு மாற்று அணி உருவாக வாய்ப்பு ஏற்படும். ஒரே ஒரு விஷயத்தில் மட்டும் அவர் விழிப்புடன் இருக்க வேண்டும்.  அது என்னவெனில் எந்த காரணத்தை கொண்டும் முழ்குகின்ற காங்கிரஸ் உடன் அவர் கூட்டணி வைத்துவிடக் கூடாது.  அவ்வாறு அவர் அணி அமைத்தால் நிச்சயம் அவர் தமிழக அரசியலில் தவிர்க்க முடியாத சக்தியாக உருவெடுத்து விடுவார் என்பது நிச்சயம்.

ஜெயா தான் இந்த பொன்னான வாய்ப்பை விஜயகாந்திற்கு ஏற்படுத்தி கொடுத்தார். அனேகமாக ஜெயா செய்யும் இரண்டாவது அரசியல் சறுக்கலாக இந்த விஷயம் இருக்கும்.

நடக்க இருக்கின்ற உள்ளாட்சி தேர்தலில் அந்தந்த பகுதிகளில் செல்வாக்காக உள்ள நபர்கள் சுயேட்சையாக நின்றால் கூட வென்றுவிடக் கூடிய சாத்தியக்கூறுகள் இருக்கின்றது. அந்தந்த பகுதிகளின் பிரச்சினைகளை பொருத்தே வெற்றியும் தோல்வியும் அடங்கியிருக்கிறது.  எனவே இங்கு அரசியல் கூட்டணிகள் என்பதெல்லாம் தேவையற்றது என்பதே கட்சிகளின் எண்ணமாக இருக்க முடியும்.

திமுக-வில் முக்கிய புள்ளிகள் அனைவரும் சிறையில் இருக்கின்றனர்.  மேலும் எந்நேரமும் வழக்கு பாயலாம் என்ற பயத்தில் இருப்பவர்களும் தேர்தல் பணி செய்ய தயங்கும் நிலை உள்ளது.  அதிமுகவோ இலவசத் திட்டங்களின் மூலம் எளிதாக மக்களின் ஓட்டுகளை பெற்றுவிடலாம் என்று கணக்கு போடுகிறது.  அவர்களின் திட்டம் முழுவதும் நிறைவேறுவதும் சந்தேகமே!  ஏனெனில் கலைஞர் ஆட்சியில் அனைவருக்கும் வண்ணத் தொலைகாட்சி பெட்டி கிடைத்தது போல் ஜெயா ஆட்சியில் இலவசங்கள் கிடைக்காது என பெரும்பாலான மக்களுக்கு தெரிந்தே இருக்கிறது.

விஜயகாந்த் கடுமையாக உழைத்தால் சில இடங்களில் வெற்றிக்கொடி நாட்டலாம்.  ஆனால் ஒருவேளை உள்ளாட்சி தேர்தலில் விஜயகாந்த் கணிசமான இடங்களில் வென்றால் எக்காரணத்தை கொண்டும் மீண்டும் அதிமுக அணிக்கு செல்லக்கூடாது.  அப்படி சென்றால் மக்களின் நம்பிக்கையை அவர் இழந்துவிடுவார்.  பாஜக உடன் கூட்டணி வைத்தாலும் கூட நல்லது எக்காரணத்தை கொண்டும் காங்கிரஸ்காரர்களுடன் மூழ்கும் படகில் ஏறவே கூடாது.  இவற்றை அவர் தொடரந்து பின்பற்றினால் நாடாளுமன்றத்தில் தேமுதிக நுழையும் வாய்ப்பை விரைவில் பெற வாய்ப்புகள் இருக்கிறது.

பொறுத்திருப்போம்.

நவக்கிரகங்கள் மனிதர்களுக்கு தரும் பலன்கள்.

நீண்ட நாளைக்கு பிறகு மீண்டும் அனைவரையும் வலைப்பதிவு மூலமாக சந்திப்பதில் மிகுந்த மகிழ்ச்சியடைகிறேன்.  என்னுடைய சொந்த அலுவல்கள் அதிகமாக உள்ளதாலும் குடும்ப பொறுப்புகள் அதிகரித்துவிட்டதாலும் தொடர்ந்து பதிவுகள் எழுத முடிவதில்லை. போதிய நேரமின்மை காரணமாக எனது தளம் வாயிலாக அளித்து வந்த இலவச ஜோதிட ஆலோசனைகள் பகுதியை தற்காலிகமாக நிறுத்தி வைத்துள்ளேன். 

தொடர்ந்து பதிவுகள் எழுத எனக்கு நேரம் கிடைப்பதில்லை கிடைத்த நேரங்களில் மற்ற தளங்களில் சென்று படிக்கவே நேரம் சரியாக உள்ளது.  எவ்வளவுதான் நாம் தெரிந்து வைத்திருந்தாலும் யாம் கற்றது கைம்மண்ணளவே! கல்லாததது உலகளவு விஷயங்கள் உள்ளன.   எனக்கு விஷயங்களை பிறருக்கு சொல்வதைக் காட்டிலும் தெரிந்து கொள்ளவே மிகவும் விருப்பம் அதிகம் ஏனெனில் நான் முழுமையாக எதையும் தெரிந்து கொண்டுவிட்டதாக என்றுமே நினைப்பவனில்லை.  மேலும் மேலும் அதிகமாக, நுணுக்கமாக தெரிந்து கொள்ளவேண்டும் என்ற ஆர்வம் என்னை என்றுமே கரையிலேயே வைத்திருப்பதாக நான் உணர்கிறேன்.  இதுவே எனது இயல்பு.

எனது மனதில் சரியெனப் பட்ட கருத்துகளை பிறர் அறிய எழுதுவதால் ஒரு மனதிருப்தி ஏற்படுகிறது.  இதனால் என்னை ஆளாக்கிய  இந்த உலகிற்கு எனது கருத்துகள் சிறிதளவு சென்று சேர்ந்தாலும் நாம் மிகவும் மகிழ்சியடைவேன்.  என் ஒருவனால் இவ்வளவு பெரிய உலகில் பெரிதாக என்ன செய்துவிட முடியும்.  வலைதளத்தில் எனது கருத்துகளை எழுத கிடைத்த வாய்ப்பை கொண்டு நல்ல விஷயங்களை பிறருக்கு சொல்வதில் ஒரு நிம்மதி ஏற்படுகிறது.  எனவே எனக்கென நேரம் கிடைக்கும் போது மட்டுமே எழுதுவேன்.  பிடித்திருந்தால் படித்துவிட்டு பாராட்டுங்கள்.

சென்ற பதிவில் ஜோதிடத்தில் சூரியன் தரும் பலன்களை பார்த்தோம் அல்லவா.  சூரியன் புதன் சேர்க்கை வரை பலன்களை சுருக்கமாக எழுதியிருந்தேன்.  தற்போது மற்ற கிரகங்களின் இணைவு பற்றியும் சில விஷயங்களை எழுதுகிறேன்.

சூரியன் குரு சேர்க்கை ஆன்மீகத்தில் அதிக ஈடுபாட்டை தரும், பல பெரிய மனிதர்களுடன் தொடர்புகள் ஏற்படும்.  இரண்டு கிரகங்களும் பாஸ்பர நட்பு கிரகங்கள் என்பதால் அதிகளவு நற்பயன்கள் கிடைக்க ஏதுவாகும்.  

சூரியன் சுக்கிரன் சேர்க்கை மிகவும் நன்மையான பலன்களை தரும்.  ஆடை ஆபரணங்கள் மீது நாட்டம் ஏற்படும்.  கலைகளில் திறமைகள் கூடும்.  ஏதோ ஒரு துறையில் நிச்சயம் நிபுணர்களாக இருப்பார்கள.

சூரியனுடன் சனி, ராகு, கேது போன்ற பகை கிரகங்களின் சேர்க்கை நற்பலன்களை தருவதில்லை.  கெடுதலான பலன்களே ஏற்படும் கண்களில் குறைகள் ஏற்படுவதோடு தந்தைக்கும் பிள்ளைக்கும் இடையே கருத்து வேற்றுமைகள் ஏற்படும்.  உடலில் உஷ்ண கோளாறுகள் பித்த சம்பந்தப்பட்ட நோய்களை தரும்.

இப்படியாக பொதுவாக பலன்களை கூறுவதை விட ஒவ்வொரு லக்னத்திற்கும் சூரியன் எந்த ஆதிபத்யம் பெறுகிறார் என்பதை பொறுத்தும் அவர் எங்கு சென்று அமர்ந்து பிற கிரகங்களின் இணைவு மற்றும் பார்வையை பெற்றிருப்பதற்கு ஏற்ப எவ்வாறு பலாபலன்களை தமது தசா புக்தி காலங்களில் சூரியன் தருவார் என்பதை ஆய்வு செய்து பலன்களை நிர்ணயிக்கும் போது தான் அது மிகச் சரியாக வரும்.  இவைகள் பொது பலன்களாக இருப்பதால் ஓரளவிற்கு மட்டுமே சரியாக வரும்.

சூரியன் மட்டுமல்ல அனைத்து கிரகங்களும் மேற்கண்ட முறையில் தான் பலன்களை தருகின்றன.  நவக்கிரகங்களில் மிகவும் சுபனாக கருதும் குரு பகவான் மிகக் கொடிய பாவியாக தீய பலன்களை ரிஷப மற்றும் துலா லக்னத்தாருக்கும், மிதுன, கன்னி லக்னத்தை சேர்ந்தவர்களுக்கும் தமது தசா புக்தி காலங்களில் அவர் அமர்ந்த இடத்திற்கு ஏற்றவாறு வழங்கியிருப்பார்.  அனுபவித்தவர்களை கேட்டு பாருங்கள்.  பலரும் மாரகத்தையும் அதற்கொப்பான கொடிய பலன்களை யும் அனுபவித்திருப்பார்கள்.

தீய கிரகம் என்று கூறப்படும் சனி பகவான் தரும் நற்பலன்களை ரிஷப லக்னத்தாரை கேட்டு தெரிந்து கொள்ளுங்கள்.

எனது அனுபவத்தில் இந்த குரு, சுக்கிரன், சூரியன் போன்ற கிரகங்கள் ஒருவருக்கு நல்ல பலன்களை அளவோடு ஓரளவு நிறைவாக வழங்கினாலும் நேர்வழியில் நிதானமாக உழைத்து முன்னேறி பலன்களை பெற்றவர்களாக அவர்கள் விளங்குவார்கள்.

ஜோதிடத்தில் யோகங்களை மழைபோல் பொழியும் ஒரு கிரகம் உண்டு .  அவர் கொடுக்க ஆரம்பித்தால் அவ்வளவுதான் அதற்கு அளவே இல்லாமல் போய்விடும் சாதாரண ஏழையாக அன்றாடங் காய்ச்சியாக இருப்பவன் கோமானாக, பெரிய தனவானாக புகழையும் பொருளையும் மிகக் குறுகிய காலத்தில் பெற்று ஓகோ என வாழ வைக்கும் அந்த கிரகம் எது தெரியுமா.  ராகு பகவான் தான்.

ஆமேட எருது சுறா நண்டு கன்னி

தன்னில் கருநாகம் புகுந்திட பூமேடந் தன்னில் ராச யோகம் 

                         என்று ஜாதக அலங்காரத்தில் ஒரு பாடல் உண்டு.

ஆம்! ராகு பகவான் யோக பலன்களை அளிக்க ஆரம்பித்தால் போதும்.  இவரா ! இந்த மனிதரா!! இந்த அளவிற்கு வாழ்வில் உயர்ந்து போனார் என்று நம்மால் நம்ப முடியாமல் போகும் அளவிற்கு பலன்களை வாரி வழங்குவார்.  என்ன அவர்கள் நேர்வழியில் அந்த நிலைக்கு வந்திருக்கமாட்டார்கள்.   ஏதாவது மறைமுகமான வழியிலேயே அவர்கள் அதனை பெற்றிருப்பார்கள.  சட்டம்,  ரெய்டு எல்லாம் இவர்களிடம் ஒன்றும் எடுபடாது.  ஒரே ஏப்பம் தான்.  எல்லாமே ஸ்வாகா. எப்படி வந்தால் என்ன கொழுக்கட்டை கிடைத்தால் சரி என்கிறீர்களா.  அது சரி.  மேலும் படியுங்கள்.

அரசியல், திரைப்படத்துறை, விளையாட்டுத் துறை, பங்குச்சந்தை என்று பல பிரபலங்கள் புகழ்பெற்ற நிலையில் இருந்த போது அவர்களுக்கு நடைபெற்ற ராகு திசை தான் அவர்களை அத்தகைய நிலைக்கு உயர்த்தியது.  என்ன ஒரு குறை என்றால் அவர்கள் அதனால் மன நிறைவுபெற்றதாக உணர மாட்டார்கள்.  எங்கோ! ஏதோ! ஒரு குறை மனதில் அவர்களுக்கு இருந்து கொண்டே இருக்கும்.  இது தான் பாவக் கிரகங்கள் தரும் யோகபலன்களுக்கும் சுப கிரகங்கள் தரும் யோக பலன்களுக்கும் உள்ள வேறுபாடு.  சுப கிரகங்கள் யோகபலன்களை நேர்வழியில் தருவார்கள்.  பாவ கிரகங்கள் எப்படியாவது தங்கள் வேலையை முடித்து விடும்.

நான் சொல்வதை படித்து விட்டு ஜோதிடம் எல்லாம் சுத்த கப்சா! அவர்கள் கடுமையாக உழைத்து போராடி அந்த நிலைக்கு வந்தார்கள் என்று கூற முனைய வேண்டாம்.   என்ன தான் ஆயுளுக்கும் கடுமையாக உழைத்தாலும் சேராத செல்வமும் செல்வாக்கும்  மிக குறுகிய காலத்தில் ஒருவருக்கு கிடைக்கிறது என்றால் அது முன்வினைப் பயனால் அன்றி வேறென்ன.  ஆம் வினைப்பயன் தான் நம் வாழ்வை நிர்ணயிக்கிறது.  தீதும் நன்றும் பிறர் தர வாரா.  நாம் செய்த புண்ணிய பலன்களின் விளைவையும் நாம் அனுபவித்து தான் ஆக வேண்டும்.  பாவமும் புண்ணியமும் கழிந்த நிலைதான் பிறவா நிலை அதுவே ஞானியரின் முக்திநிலை.

என்ன! யோகம் என்று படிக்கும் போதே ஆ!! என்று வாயை பிளந்து கொண்டு இருக்கிறீர்களா.  அதே ராகு பகவான் தான் தீமை செய்யும் நிலையில் ஒருவர் ஜாதகத்தில் இருக்கும் போது தரும் பலன்களை கண்டால் ஐயோ! என் எதிரிக்கு கூட இந்த நிலை வரக்கூடாது என்று வருந்துவீர்கள்.  ஆம்!  எப்பேர்பட்ட உயர்ந்த நிலையில் இருப்பவர்கள் கூட ஒரே நாள் இரவில் தலைகீழாக வாழ்க்கையை புரட்டி போடும் போது என்ன செய்வார்கள்  பாவம்.  விமானத்தில் ஏறி உயரே சென்றவர்கள் ராக்கெட் வேகத்தில் கீழே வந்து விழுவார்கள். ஒருவன் செல்வத்தை கூட இழக்கலாம் ஆனால் இது நாள் வரை கட்டிக் காத்த பேரையும், புகழையும் ஒருவன் இழப்பானேயானால் அது மரணத்திற்கு சமமானதல்லவா!

அவ்வாறே கேது பகவான் ஒருவருக்கு வாழ்வில் ஞானத்தை தரும் பொருட்டு அவனுக்கு வாழ்வில் விரக்தி ஏற்படும் அளவிற்கு துன்பங்களை தருவார்.  ராகுவை போல் கொடுப்பவரில்லை கேதுவைப் போல் கெடுப்பவரில்லை என்பது ஜோதிட பழமொழி.  இந்த உலகில் எல்லாமே மாயை, பொய் அனைவரும் சுயநலவாதிகள் என்ற உண்மையை நமக்கு வாழ்வில் படிப்பினையாக தருபவர் கேது.  அதனால் தான் ஜோதிடம் அவரை ஞானக் காரகன், மோட்சக் காரகன் என்று அழைக்கிறது.   ஞானம் வந்த பின்பு மனிதன் மீண்டும் பழைய நிலைக்கு அழைத்தாலும் செல்ல மாட்டான் அல்லவா.  அதனால் தான் ஞானிகளுக்கு அரசனும் ஆண்டியும் ஒன்றாக தெரிகிறார்கள்.

இன்னும் சுவாரஸ்யமான பல விஷயங்களை இங்கு எழுத விருப்பம் தான்.  பெரிய பதிவாக இருந்தால்  நன்றாக இருக்காது.  எனவே தொடர்ந்து அடுத்தடுத்த பதிவுகளில் எழுதுகிறேன். கருத்துரைகள், விளக்கங்களை பின்னூட்டம் வாயிலாக கேளுங்கள்.  அதுவே எனக்கு மேலும் எழுத ஊக்கத்தை தருவதாக அமையும்.

நன்றி.

ஜோதிடமும் - மனிதர்களும் - ஓர் ஒப்பீடு

ஆதிகாலத்தில் வாழ்ந்த நமது முன்னோர்கள் கிரகங்களை வெறும் கண்களால் பார்க்கும் சக்திகளை பெற்றிருந்தார்கள்.  சமீபத்தில் நான் ஒரு வலைதளத்தில் ஒரு பதிவை படித்ததாக ஞாபகம், கல்தாமரை என்ற மூலிகை சதுரகிரியில் இருக்கிறது, அந்த அதிசய மூலிகையின் மேல் நின்று ஆகாயத்தை பார்த்தால் பகலில் கூட நட்சத்திரங்கள், நவகிரகங்கள் பளிச்சென நம் கண்களுக்குத் தெரியுமாம்.  அத்தகைய அறிவும், ஆற்றல்களையும், அனுபவங்களையும் நிரம்ப பெற்றவர்கள் நம் முன்னோர்களான தவமுனிவர்கள்.

நமது  முன்னோர்கள் வானில் உள்ள கிரகங்கள், நட்சத்திரங்கள் மற்றும் சூரிய, சந்திரர்களின் சஞ்சாரங்களை கொண்டு காலநிலைகளை கணக்கிட பயன்படுத்தி வந்துள்ளனர்.  ஜோதிடத்தின் ஆரம்பம் வான சாஸ்திரம் ஆகும். காலப்போக்கில் ஒரு குறிப்பிட்ட கிரக நிலையில் இருக்க பிறந்தவர்களின் வாழ்வில் ஏற்படும் பல்வேறு நிகழ்வுகளை கவனித்து  அவற்றை சேகரித்து ஒப்பிட்டு பார்க்க தொடங்கினார்கள்.  தங்களின் அனுபவத்தில் கிடைத்த தகவல்கள் பலவற்றையும் திரட்டி ஓலைச்சுவடிகளில் எழுதிவந்தனர்.  அந்த அடிப்படையில் தோன்றியதே ஜோதிடம் என்னும் அரிய கலையாகும்.

 

குறிப்பிட்ட காலகட்டத்தில் கிரகங்கள் அந்தந்த ராசிகளில் இருக்கப் பிறந்தவர்கள் இன்னின்ன பலன்களை அனுபவித்தனர்.  எனவே பிற்காலத்தில் அவ்வாறான கிரக அடைவுகளை பெற்று பிறந்தவர்களுக்கும் அத்தகைய பலாபலன்கள் ஏற்படலாம் என தங்களின் அனுபவத்தின் அடிப்படையில் கிரகங்களுக்கும், இராசிகளுக்கும் குணாதிசயங்களையும், இன்ன பிற இயல்புகளையும் நிர்ணயித்தனர்.

சரி இப்போது விஷயத்திற்கு வருவோம்.  ஜோதிடத்தில் முதன்மையான கிரகம் சூரியன் ஆகும்.  கிரகங்களுக்கு தலைவனாக இருக்கும் சூரியன் ஜோதிடத்தில் நெருப்பு கிரகமாக குறிப்பிடப்படுகிறது.  பிறந்த ஜாதகத்தில் சூரியன் ஆதிக்கம் அதிகமாக இருக்கப் பிறந்தவர்கள் உஷ்ண, பித்த தேகம் கொண்டவர்களாகவும்.  எந்த காரியத்தையும் கணகச்சிதமாக நிறைவேற்றக் கூடியவராகவும், நேர்மையான எண்ணம் கொண்டவர்களாகவும் இருப்பார்கள்.  சூடான உணவு பதார்த்தங்களை மிகவும் விரும்பி உண்ணக்கூடியவர்களாக இவர்கள் இருப்பார்கள்.

காட்டிற்கு ராஜா சிங்கம். கர்ஜிக்கும் சிங்கத்தின் குரலைக் கேட்டாலே மற்ற மிருகங்களுக்கு எல்லாம் உள்ளுக்குள் உதறல் எடுக்க ஆரம்பித்துவிடும்.  இயற்கையாகவே தலைமை தாங்கும் குணம் இயல்பாக அவர்களிடம் இருக்கும்.  சூரியன் ஆதிக்கம் பெற்ற பலரும் அத்தகைய குணங்களை பெற்றிருப்பினும் வெளியில் நாம் பார்க்கும் போது சாதாரண இயல்புடையவர்களாக தெரிவார்கள்.  ஆனால் மிக முக்கியமான நெருக்கடியான நிலை ஏற்படும் போதுதான் அவர்களின்  உண்மையான சுபாவம் நமக்கு தெரியவரும்.  

சூரியன் நல்ல நிலையில் அமைந்தவர்ககள் மிகவும் நேர்மையாகவும், ஒளிவு மறைவு இல்லாத, தன்னலமில்லாமல் வாழும் இயல்புடையவர்கள்.  தங்கள் கண்முன்னே நடக்கும் அநீதிகளை தட்டிக்கேட்க தயங்காதவர்கள்.  பொய், சூது, வாது. திருட்டு போன்ற தீயகுணங்களை அறவே வெறுப்பவர்கள்.  தங்களைப் போலவே மற்றவர்களும் வெளிப்படையாக இருக்க வேண்டும் என எதிர்பார்ப்பு அவர்களிடம் இருக்கும்.  இவர்களுக்கு கோபம் வரும்படி யாரும் நடந்து கொள்ளக்கூடாது. தவறி கோபம் வந்தால் வெடித்து சிதறிவிடுவார்கள்.  தங்கள் முன்னே எவ்வளவு பெரிய ஆளாக இருந்தாலும் தங்களது எதிர்ப்பை எவ்விதத்திலேயும் காட்ட துணிந்தவர்கள்.

12 இராசிகளில் சிம்ம லக்னம்  சூரியனின் ஆட்சிவீடாகும்.  மேற்கண்ட குணாதிசயங்கள் ஏறக்குறைய சிம்ம லக்னத்தில் பிறந்தவர்களுக்கும் அல்லது சிம்ம ராசியில் சந்திரன் இருக்கப் பிறந்தவர்களுக்கும் காணப்படும்.  மேலும் மற்ற லக்னங்களில் பிறந்திருந்தாலும் சூரியன் பிறந்த ஜாதகத்தில் நல்ல ஆதிபத்யம் பெற்று  ஆட்சி, உச்சம், நட்பு பெற்று  நல்ல நிலையில் அமைந்திக்க பிறந்தவர்கள் அனைவருக்கும் மேற்கண்ட சூரியனின் குணாதியங்கள் பெற்றிருப்பர்.

அரசியலில் நம்மை வழிநடத்தும்  பலரும் சூரியன் நல்ல நிலையில் இருக்க பிறந்தவர்களே ஆவர்.  நேர்மையற்ற அரசியல் தலைவர்களுக்கு சூரியன் தீய கிரகங்களின் பார்வை அல்லது சேர்க்கை பெற்று வலிமையுடன் இருப்பார்.  சூரியன் நல்ல நிலையில் இருக்கப்பிறந்தவர்கள் ஆயிரம் பேர் கொண்ட கூட்டத்தில் கூட தனித்து தெரிவார்கள் அவர்களது முகம் பிரகாசமாகவும், மிகவும் செயல்திறன் கொண்டவர்களாகவும் இருப்பர்.  அவர்களை ஆயிரத்தில் ஒருவன் என்று கூறலாம்.  அரசனாக வாழ்பவர்கள் அல்லது அரசனுக்கு ஒப்பானவர்கள் இவர்கள். தற்காலத்தில் அரசு பதவியில் உள்ளவர்கள் அனைவருக்கும் ஏதேனும் ஒருவகையில் சூரியன் வலுப்பெற்றிருப்பதை அவர்களது ஜாதகத்தில் காணலாம்.  தந்தையின் அன்பை பெற்றவர்கள் தந்தைவழி அனுகூலமும் அவர்களுக்கு உண்டு.

ஜாதக்த்தில் சூரியன் வலிமை குன்றி இருந்தால் அவர் ஆளுமைத்திறன் கொண்டவராக இருக்க முடியாது. மேலும் அவர்களுக்கு உடலில் உஷ்ண கோளாறுகள் ஏற்படும்.  கண்களில் ஒளிக்கு காரணம் சூரியனும் சந்திரனும் ஆவார்கள் என ஜோதிடம் குறிப்பிடுகிறது.  எனவே சூரியன் பாதிப்படைந்த நிலையில் பிறந்தவர்கள் கண்களில் குறைபாடுகள் உள்ளவர்களாக இருப்பர்.  சூரியன் நமது குடும்பத்தில் தந்தைக்கு காரகம் வகிப்பவர்.  எனவே தந்தை வழி உறவுகள் பாதிப்படையும் பலருக்கு தந்தையை பிரிந்தோ அல்லது தந்தை உயிருடன் இல்லாமலோ உள்ள நிலை ஏற்படும்.

சூரியனுக்கு உகந்த தானியம் கோதுமை.  பஞ்ச பூதங்களில் சூரியன் நெருப்பை குறிக்கிறார்.  சிலரைப் பார்த்தால் நல்ல  பளபளப்பான வழுக்கை தலையுடன் பெரிய மனிதரைப் போல இருப்பார்கள் அவர்க்கெல்லாம் ஜாதகத்தில சூரியன் வலுவாக இருக்கும் சூரியன் தலை மயிரை குறிப்பவர்.  உடல் உஷ்ணத்தால் தலையில் உள்ள மயிர்களலெல்லாம் கொட்டிவிடும். 

சூரியனுக்கு உகந்த நிறம் ஆரஞ்சு நிறமாகும்.  நவரத்தினங்களில் மாணிக்க கல் சூரியனுக்கு மிகவும் உகந்தது (கல்லெல்லாம் மாணிக்க கல்லாகுமா என்ற பாடல் நினைவுக்கு வருகிறதா!!).  எண்கணிதத்தில் முதல் எண்ணாகிய எண் 1 சூரியனுக்குரிய எண்ணாக குறிப்பிடப்படுகிறது.  கடவுள்களில் முதன்மையான சிவன் சூரியனுக்குரிய அதிதேவதையாக உள்ளார்.   27 நட்சத்திரங்களில் கார்த்திகை, உத்திரம்,  பூராடம் சூரியனின் நட்சத்திரங்களாக குறிப்பிடப்படுகிறது.

அரிது அரிது மானிடராக பிறத்தல் அரிது என்றார் ஔவையார்.  

நான் இங்கு சொல்ல வருவது என்னவென்றால் அரிது அரிது சூரியன் வலுவாக நல்ல நிலையில் உள்ள மனிதர்களாக பிறத்தல் அரிது.   ஏனென்றால் கடமை, கண்ணியம், கட்டுப்பாடு, உண்மை, நேர்மை இவற்றிற்கெல்லாம் அதிபதியான சூரியனின் ஆதிக்கத்தில் பிறந்த ஆண்மை மிக்க ஒரு தலைவன் நமக்கு அமையாமல் இருப்பதால் தான் நாம் முதுகெலும்பற்ற மனித புழுக்களாக, லஞ்சம், ஊழல் என்ற சாக்கடையில் எல்லாவற்றையும் சகித்துக் கொண்டு வாழ வேண்டியதாகிறது.  

தர்மத்தின் வாழ்வுதனை சூது கவ்வும், தருமம் மறுபடியும் வெல்லும் என்ற  பாரதியின் பாஞ்சாலி சபதம் பாடல் நினைவுக்கு வருகிறது.  நிச்சயம் நமக்கெல்லாம் ஒரு விடிவு காலம் பிறக்கும்.  நமது முன்னாள் குடியரசுத் தலைவர் திரு. அப்துல்கலாம் அவர்கள் குறிப்பிட்டபடி நம் தாய்நாடு விரைவில் வல்லரசாக மாறும்.  சூரியனின் ஆதிக்கம் பெற்ற அந்த ஆதிசிவனே மனிதனாக நிச்சயம் இந்த பூவுலகில் அவதரித்து நம்மையெல்லாம் வழிநடத்த வேண்டும்.  மீண்டும் இந்த பூவுலகில் ராமராஜ்யம் விரைவில் அமைய வேண்டும் என்று நாம் அனைவரும் தினமும்  இறைவனை பிரார்திப்போம்.

அடுத்த பதிவில் சந்திப்போம்

சு. மணிகண்டன்.