ஜோதிட ஆய்வுத் தொடர் - மேஷ லக்னம் - பாகம் 2

வணக்கம் நண்பர்களே!

ஜோதிடத்தில் குறிப்பிட்ட லக்னத்தில் பிறந்திருந்தால் இன்னென்ன குணாதிசியங்கள் ஜாதகருக்கு இருக்கும் என்று குறிப்பிட்டிருப்பார்கள்.

உதாரணமாக சிம்ம லக்னத்தில் பிறந்திருந்தால் நேர்மையாக இருப்பார்கள், ஈகோ அதிகம் இருக்கும்.  எந்த ஒரு விஷயத்திலும் முக்கியத்துவம் பெறுவதை விரும்புவார்கள்.  முன்கோபம் உடையவர்கள் என்று அவர்களுக்குரிய பொதுவான குணாதிசியங்களை குறிப்பிடப்பட்டிருக்கும்.

இதில் இன்னும் ஒரு விஷயம் இருக்கிறது.  அதாவது சிம்மத்தின் குணாதிசியங்களை பெற்றிருக்க ஒருவர் சிம்ம லக்னத்தில் தான் பிறக்க வேண்டுமென்பதில்லை.  லக்னத்தில் சூரியன் பலம் பெற்று எந்த லக்னத்தில் பிறந்திருந்தாலும் அவர் சூரியனுக்கு உரிய குணாதிசியங்களை பெற்றிருப்பார்.

சிம்ம லக்னத்தில் பிறந்திருந்தும் சிம்மத்தின் குணாதிசியங்கள் அவரிடத்தில் காணப்பட வில்லையெனில் அவர் சிம்மலக்னத்தில் பிறந்திருந்தாலும் அவரது லக்னத்தில் வேறு கிரகங்கள் பலமாக இருந்தோ அல்லது அந்த கிரகங்கள் பலம் பெற்று லக்னத்தை பார்த்தோ இருந்திருக்கும்.  எனவே அவரிடம் சிம்மத்தின் குணாதிசியங்களை விட அந்த கிரகங்களின் குணாதிசியங்களே அதிகம் இருக்கும்.

ஆக ஒரு கிரகத்தின் பலனை பெற்றிருக்க அந்த லக்னத்தில் தான் பிறந்திருக்க வேண்டும் என்பதில்லை.  எந்த லக்னத்தில் பிறந்திருந்தாலும் கிரகங்கள் அவரது லக்ன பாவத்தில் பெறும் பலத்திற்கு ஏற்பவே ஜாதகருடைய குணாதிசியங்கள் இருக்கும்.  லக்னத்தில் எந்த கிரகமும் இல்லை, எந்த கிரகமும் பார்க்கவில்லை எனில் ஜாதகர் லக்னாதிபதியின் குணாதிசியங்களை பெற்றிருப்பார்.

நான் கண்ட ஜாதகங்களில் லக்னத்திற்கு பல கிரகங்களின் சம்பந்தம் பெற்றிருப்பதை கண்டிருக்கிறேன்.  லக்னத்தில் அல்லது லக்னத்திற்கு ஏழில் கிரகங்கள் அதிகம் அமையப்பெற்ற ஜாதகர்கள் சகலகலா வல்லவர்களாக இருப்பார்கள்.  பன்முகத் திறமைகளை பெற்றிருப்பார்கள்.  அந்தந்த கிரகங்களின் குணாதிசியங்கள் அவர்களிடம் இருக்கும். 

சரி இப்போது மேஷலக்ன பலன்களுக்கு வருவோம்.

மேஷத்தில் பிறந்தவர்களுக்கு லக்னம் முதல் 5 பாவங்கள் வரையிலான வீடுகளில் லக்னாதிபதியான செவ்வாய் அமர்ந்திருக்க தரும் பலன்களை சென்ற பதிவில் பார்த்தோம்.

செவ்வாயானவர் மேஷலக்னத்திற்கு 6-ல் கன்னியில் அமர்ந்தால் என்ன பலன்களை தருவார்.

மேஷலக்னத்தாருக்கு புதன் கொடிய பாவியாகிறார். எப்படி?

புதன் தீயபாவங்களான 3-க்கும் 6-க்கும் உடையவர்.  மேலும் லக்னாதிபதியான செவ்வாய்க்கு  புதன் பகைவர்.  ஆனாலும் புதனுக்கு செவ்வாய் சமம் என்ற அளவில் வருவார்.

என்னதான் புதன் செவ்வாயை சமம் என்று இருந்தாலும் சற்று அலட்சியமாகவே நினைப்பார்.

செவ்வாய் என்றால் கோபம், ஆத்திரம் ஆகியவற்றிற்கு காரகர்.

புதன் என்றால் புத்திசாலித்தனத்திற்கு காரகர்.

எனவே தான் ஆத்திரகாரனுக்கு புத்தி மட்டு என்ற பழமொழி வந்ததோ?!

ஆக மேஷ லக்னத்தாருக்கு 6-மிடமாக வரும் கன்னி புதனுடைய வீடாக அமைவதால் எதிரிகள் மிகுந்த புத்திசாலிகளாக இருப்பார்கள்.  இவர்கள் கொஞ்சம் ஏமாந்தாலும் அவர்களை காலி செய்து விடுவார்கள்.  எனவே மேஷத்தில் பிறந்தவர்கள் எதிரிகளிடம் மிகுந்த எச்சரிக்கையாக இருக்க வேண்டும்.  அவன் எதிரியாகவே தெரியமாட்டான் ஆனால் முதுகுக்கு பின்பு ஏகப்பட்ட வேலைகள் நடக்கும்.  மேஷத்தாரை நேருக்கு நேராக மோதி வெற்றிபெறுவது கடினம் என்பது எதிரிக்கு தெரியும்.  அதனால் அவர்களை புத்தியால் வென்றுவிடுவார்கள்.

இப்படிப்பட்ட எதிரியின் வீடான கன்னியில் லக்னாதிபதி செவ்வாய் சென்று மாட்டிக்கொண்டால் ஜாதகரின் நிலை?

ஜாதகருக்கு எதிரிகள் அதிகம் இருப்பார்கள், நரம்பு, தோல் சம்பந்தப்பட்ட வியாதிகள் தோன்றும். வம்பு, வழக்குகள், நோய், கடன் தொல்லைகள் என்று தொடர்ந்து வந்துக்கொண்டிருக்கும்.  

ஆனாலும் செவ்வாய் பாபக்கிரகம் என்பதாலும் 8-க்குடைய அஷ்டமாதிபத்யம் பெறுவதாலும் அவர் 6-ல் சென்று மறைவது ஒரு விதத்தில் நல்லது தான் என்றாலும் லக்னாதிபதியாயிற்றே அவர் மறையலாமா என்றால் மறையலாம் என்பதுதான் பதில்.  ஏனெனில் ஜாதகர் அனைத்திலும் வெற்றிபெறுவார்.  போராட்டம் இல்லாத வாழ்க்கை என்ன வாழ்க்கை.  போராடி கிடைக்கும் வெற்றி ஜாதகருக்கு மகிழ்ச்சியை தரும்.

இங்கு முக்கியமான ஒரு விஷயத்தை கவனிக்க வேண்டும்.  செவ்வாயுடன் புதன் இணைந்து இருக்கக்கூடாது.  அவ்வாறு இணைந்தால் மரணத்திற்கு ஒப்பான கண்டங்கள் சம்பவிக்கும்.  ஏனெனில் செவ்வாய் மரணத்தை குறிக்கும் 8-க்கு உடையவராகவும் வருகிறார்.  இந்த வீட்டில் புதன் உச்சம் அடைகிறார்.  ஆறாம் அதிபதி பலம் பெற்று லக்னாதிபதி பகை பெறுவதால் தீயபலன்களே அதிகம் நடைபெறும்.

செவ்வாய் 7-ம் இடமான துலாத்தில் இருந்தால் என்ன பலன்களை தருவார்.

ஒரு கிரகம் எந்த வீட்டில் இருக்கிறதோ அந்த வீட்டின் பலன்களை சார்ந்துவிடுகிறது.  லக்னாதிபதி லக்னத்தில் இருந்தால் ஜாதகர் சுய முயற்சியுடையவர்.  2-ல் இருந்தால் குடும்பத்தின் மீது பற்று உடையவர்.  4-ல் இருந்தால் தாயார் மீது அன்புடையவர்.  5-ல் இருந்தால் குழந்தைகள் மீது பாசம் அதிகம் இருக்கும்.  9-ல் இருந்தால் தந்தைபாசம் உடையவர்.  

இப்போது சொல்லுங்கள் லக்னாதிபதி மனைவியை குறிக்கும் 7-ல் இருந்தால் பலன் என்ன?

யூகித்துவிட்டீர்களா? அதேதான்.  ஜாதகர் மனைவியே கதியென்று இருப்பார்.  மாமனார் வீட்டு மகாராஜன்.  7-ம் இடம் காமத்தையும் குறிக்கிறது அல்லவா? எனவே ஜாதகரிடம் காமம் அதிகம் இருக்கும்.  மேலும் லக்னாதிபதியானவர் செவ்வாயாகவும் 7-க்குடையவர் சுக்கிரனாகவும் இருப்பதால் நம்ம ஆள் கொஞ்சம் அதிகமாகவே ஆட்டம் போடுவார்.  குடும்ப வாழ்க்கை சிறப்பாக அமையும்.  

செவ்வாய் 10-மிடம், லக்னம், 2-மிடம் ஆகிய வீடுகளை பார்ப்பார்.  மேலும் சப்தம கேந்திரம் பெற்றதால் பலம் பெறுகிறார்.  எனவே செவ்வாய் 7-ல் இருப்பது சிறப்பு.

ஆனாலும் சுக்கிரன் மேஷத்திற்கு 2, 7-க்குடைய பிரபல மாரகாதிபதியாக  அமைகிறார்.  எனவே 7-ல் சுக்கிரனுடன் இணைந்து இருந்தால் மாரகத்திற்கு சமமான கெண்டங்களையும் தருவார். செவ்வாய் 8-க்கும் அதிபதியாயிற்றே.  வாகனங்களில் செல்லும் போது மிகுந்த கவனம் தேவை.

செவ்வாய் 8-ல் தனது சொந்த வீடான விருச்சிகத்தில் ஆட்சிபெறுவது நன்மைதான்.  ஆயுள் பலம் அதிகரிக்கும்.  ஜாதகர் தான் பிறந்த இடத்திலிருந்து வெளியிடங்களில் சென்று வாழ்வார்.  அங்கு நல்ல நிலையில் இருப்பார்.  ஆனாலும் அஷ்டமாதிபதி பலம் பெறுவது எந்த லக்னத்திற்கும் நல்லதில்லை.  அந்த வகையில் தேக பீடை, வைத்திய செலவு, நோய்கள், அவமானங்கள், தொல்லைகள், துன்பங்கள் என்று ஏற்படத்தான் செய்யும்.

செவ்வாய் தனது நண்பரான குருவின் தனுசுவில் 9-ல் அமர நன்மையான பலன்களை தருவார்.   லக்னாதிபதி பாக்யம் பெற்றது சிறப்பு.  அதுவும் பொது சுபரும், மேஷலக்ன சுபருமான குருவின் வீட்டில் அமருவது என்பது மிகவும் சிறப்பு.  ஜாதகர் அனைத்து பாக்கியங்களையும் பெறுவார்.  தர்ம சிந்தனை மிக்கவர்.  தெய்வ நம்பிக்கை உடையவராக இருப்பார்.  ஜாதகர் பெரிய மனிதர், சமுதாயத்தில் மதிப்புமிக்கவராக மதிக்கப்படுவார்.  வெளிநாட்டு பயணங்கள் மேற்கொள்ளும் வாய்ப்புகள் வரும்.  பெற்றோர் மீது மிகவும் பாசமாக இருப்பார்.  ஆனாலும் செவ்வாயானவர் 8-க்குடையவராக 9-ல் அமர்வதால் தந்தைக்கு பல கஷ்டங்கள் ஏற்படும்.  குரு பலம் பெற்றிருந்தால் மிகவும் நன்மையாக அமையும்.

அன்பார்ந்த வாசகர்களே! இந்த தொடர் அவ்வளவு சீக்கிரம் எளிதில் முடிந்துவிடாது.  ஏனெனில் ஒவ்வொரு லக்னத்திற்கும் லக்னாதிபதி முதற்கொண்டு மற்ற கிரகங்கள் லக்னம் முதல் 12 வீடுகளில் அமர்ந்திருந்தால் என்ன பலன்களை தரும் என்பதை மேஷம் முதல் மீனம் வரை லக்ன ஆதிபத்யம், லக்ன காரகத்துவம், மற்றும் கிரக காரகத்துவம் ஆகியவற்றை கொண்டு கிரகங்கள் அமர்ந்த வீடுகளில் பெறும் பலம் பலவீனங்களுக்கு ஏற்ப பலன்களை யூகித்து  தொடர்ந்து எழுதவிருக்கிறேன்.

பல நூல்களில் மறைந்த புதன் நிறைந்த பலன் தரும், மகத்தில் பிறந்தால் ஜெகத்தை ஆளும் என்று பொத்தாம் பொதுவாக பலன்களை தந்திருப்பார்கள்.  மேலும் கிரகங்கள் 4-ல் இருந்தால் இன்ன பலன், செவ்வாய் சிம்மத்தில் இருந்தால் இன்ன பலன் என்று எழுதியிருப்பார்கள்.

ஆனால் இவையெல்லாம் பொது பலன்கள்.  இவற்றை வைத்து பலன்கள் கூறினால் சிலவற்றிற்கு சரியாக வரும் பலவற்றிற்று சரியாக வராது.  ஏனெனில்  எந்த லக்னத்திற்கு அந்த கிரகம் நன்மையை தரும் என்பதை அந்த கிரகம் பெறும் ஆதிபத்யம், காரகத்துவம் மற்றும் அந்த கிரகம் அமர்ந்த வீட்டில் பெறும் பலம் பலவீனம் ஆகியவற்றை கொண்டுதான் சொல்ல வேண்டும்.

இவற்றை லக்னவாரியாக நாம் பொறுமையாக அலசி ஆராய்ந்து தான் பலன்களை சொல்ல வேண்டுமே ஒழிய பொத்தாம் பொதுவாக குருவா! உச்சம் ஆகா ஓகோ, சனியா! நீசம் விளங்காது என்று கூறுவது தவறான பலன்களாகவே அமையும்.

ஜோதிடத்தில் உருப்படியாக ஏதேனும் எழுத வேண்டும் என்றால் இந்த மாதிரி ஒவ்வொரு லக்னத்திற்கும் கிரகங்கள் தரும் பலன்களை முடிந்தவரை அனுபவத்தில் கண்டறிந்து எளிமையாக பலன்களை காண வேண்டும்.  பல நூல்களில் இவ்வாறு கொடுத்திருக்க மாட்டார்கள்.  

பல தொழில் முறை ஜோதிடர்கள் தாங்கள் அனுபவத்தில் கண்ட ஜாதகங்களில் கிரகங்கள் ஜாதகருக்கு கொடுத்த பலன்களை கேட்டு அறிந்திருப்பார்கள்.  அவற்றை ஜோதிட விதிகளோடு ஒப்பிட்டு எந்த அளவிற்கு அந்த விதிகள் பலன்களை தருகின்றன என்பதை அனுபவத்தில் அறிந்திருப்பார்கள்.  அந்த விதிகளை அவர்கள் அனுபவத்தில் கண்டதால் அவர்களுக்கு மிக எளிதாக மனதில் தங்கிவிடும்.  

எனவே ஜோதிட நூல்களை மட்டும் படித்துக்கொண்டு பலன்களை சொல்லிவிட முயலக்கூடாது.  அந்த விதிகள் அனுபவத்தில் எவ்வாறு பலன்களை கொடுக்கின்றன என்பதை நடைமுறையில் அறிந்து அதற்கு என்ன காரணம் என்று ஆராய்ந்து அறிந்து பலன்களை கூறினால் 100 சதவீதம் பலன்கள் தப்பாமல் அப்படியே நடக்கும்.

நான் இந்த தொடரில் எழுதிய பலன்கள் அப்படியே நடக்க வேண்டும் என்பது எந்தவித கட்டாயமும் இல்லை.  ஏனெனில் நான் கிரகங்கள் எந்தெந்த வீடுகளில் அமர்வதால் என்னென்ன பலன்களை என்ன காரணத்தால் தரும் என்று ஒரு யூகத்தின் அடிப்படையில் எனது ஜோதிட அறிவின் அடிப்படையில் மட்டுமே எழுதுகிறேன்.  ஆனால் உண்மையில் நாம் பார்க்கும் பல ஜாதகங்களில் மிகவும் சிக்கலான பல அமைப்புகள் இருக்கும்.  பல கிரகங்கள் கூட்டாக ஒரு வீட்டில் அமர்ந்திருக்கும் அல்லது பல கிரகங்கள் ஒரே வீட்டை பார்க்கும்.  அதில் உச்சம், நீசம், ஆட்சி, அஸ்தமனம், பகை என்று ஏகப்பட்ட கலாட்டாவாக இருக்கும்.

இவற்றையெல்லாம் நிதானமாக கவனித்து எந்த கிரகம் பலம் பெற்றுள்ளது, எது எதனால் பாதிப்படைந்துள்ளது.  சேர்க்கை நல்லதா கெட்டதா என்றெல்லாம் அலசி ஆராய்ந்து, ராசி, அம்சம், நடப்பு தசா புக்தி, கோச்சராம் ஆகிவற்றோடு அனுப அறிவையும் உபயோகித்து பலன்களை சொல்ல வேண்டும்.

நான் இங்கு எழுதுவதெல்லாம் எந்த கோணத்தில் நாம் ஜாதகங்களை அலசவேண்டும்.  எந்தெந்த அம்சங்களை நாம் கணக்கில் எடுத்துக்கொள்ள வேண்டும் என்ற ஒரு வழிகாட்டி முறையே. 

ஜோதிடம் என்பது அவ்வளவு எளிதான ஒரு விஷயம் அல்ல.  அதற்கு பல்முனைநோக்கு திறமையும், நிதானமும், ஆய்வும், ஆராய்ச்சியும், அனுபவமும் அதிகம் தேவை.  இவையனைத்தும் ஒரே நாளில் ஒருவருக்கு கிடைத்துவிடாது.  பொறுமை, தொடர்ந்த விடா முயற்ச்சி,  ஆர்வம் ஆகியவையே ஒருவருக்கு இவற்றை பெற்றுத் தரும். 

அடுத்த பதிவில் தொடர்ந்து எழுதுகிறேன் நன்றி.

படித்தால் மட்டும் போதுமா?.......

ஜோதிடத்தில் பலன்களை கண்டறிய ஜோதிடம் பற்றிய அடிப்படைகளை தெரிந்திருந்தால் மட்டும் போதாது.  கொஞ்சம் போல சிந்திக்கும் திறனும், சமயத்திற்கு தகுந்தாற்போல் அவற்றை பயன்படுத்தும் திறனும் உள்ளவர்களால் மட்டுமே சிறந்த ஜோதிடராக முடியும்.

முதலில் ஜோதிடத்தின் அடிப்படை என்ன?

ஜோதிடம் என்பது 12 ராசிகட்டங்களையும், 9 கிரகங்களையும் கொண்டு இந்த உலகில் பிறந்த அனைத்து தரப்பு மக்களுக்கும் பலன்களை கண்டறிய பயன்படுத்தும் ஒரு வழிமுறை என எளிமையாக கூறலாம்.

இங்கு மற்றுமொரு விஷயம் இருக்கிறது.  என்னவென்றால் இந்த 12 ராசிகளுக்கும் தனித்தனி காரகத்துவம், குணாதிசியங்கள், தன்மைகள், அமைப்பு, தோற்றம் என்று விரிந்துகொண்டே செல்லும்.  அவ்வாறே சூரியன் முதல் கேது வரையிலான நவக்கிரகங்களுக்கும் பல தரப்பட்ட காரகத்துவங்களை அளித்துள்ளனர்.

ஜோதிடத்தின் சூட்சுமமே இதில்தான் அடங்கியிருக்கிறது. எந்த காரகத்துவத்தை கொண்ட கிரகங்கள் எந்த காரகத்துவம் கொண்ட வீட்டில், எந்த ராசியில், எந்த கிரகத்தின் நட்சத்திர சாரத்தில் இருக்கிறது. என்பதை அறிந்துகொண்டு அதற்கேற்றவாறு ஜோதிட விதிகளை பயன்படுத்தி பலன்களை நிர்ணயம் செய்கின்றனர்.

அதாவது ஒவ்வொரு கிரகத்திற்கும் பலவிதமான காரகத்துவங்கள், அவ்வாறே ஒவ்வொரு ராசிக்கும் பலவிதமான காரகத்துவங்கள் என்று விரிந்துகொண்டே செல்லும்.  எதனோடு எதனை கலந்தால் என்னவிதமான பலன்கள் நடைபெறும் என்பதை நாம் படித்த ஜோதிட விதிகளை கொண்டு ஓரளவிற்கு கூறலாமேயன்றி துல்லியமாக மிகச்சரியாக கூறுவதில் சில தவறுகள் ஏற்பட வாய்ப்புகள் உண்டு.   இந்த இடத்தில் தான் ஜோதிடருக்கு ஜோதிடர் வித்தியாசப்படுகின்றனர்.

ஏனெனில் ஜோதிடர்களின் அறிவு, அனுபவம், சமயோசித புத்தி மற்றும் தம்மிடம் ஜோதிடம் கேட்க வருகின்ற மனிதரின் மனநிலை, குணாதிசியங்கள் போன்றவற்றை அவரது ஜாதகத்தின் வாயிலாக அறிந்து அவரது மனநிலைக்கு ஏற்றாற்போல் அவர் தாங்கும் திறனுக்கு ஏற்றாற்போல் அவருக்கு நடக்கும் பலாபலன்களை கூறவேண்டும்.  அதற்கு ஜோதிடரும் ஓரளவிற்கு பக்குவம் அடைந்தவராய், இறைபக்தி உடையவராய், நல்லதொரு பழக்கவழக்கங்களை கொண்டவராய் இருத்தல் அவசியம்.  நல்ல நேர்மறையான எண்ணங்களை உடைய மனிதராய் இருத்தல் மிக மிக அவசியம்.

சில பேர் இருக்கிறார்கள்.  சனி நீசமா விளங்காது, குரு உச்சமா! ஆகா! ஓகோ! என்று ஜாதகத்தை பார்த்தும் பார்க்காமல் பலன்களை படார் படார் என்று பலன் கூற ஆரம்பிப்பார்கள்.  இன்னும் சில வகையான ஜோதிடர்கள் நாத்திகம் பேசுவார்கள், புறங்கூறுவார்கள், பொய் களவு போன்ற தீயசெயல்களை புரிபவர்களாகவும், மது, மாமிசம் அருந்துதல் போன்றவற்றையும், கோபம், பிடிவாதம் போன்ற குணங்களையும் கொண்டிருப்பர்.  மிகமுக்கியமாக எதிர்மறை எண்ணங்கள் நிரம்ப உடையவராக இருப்பர்.  எந்த ஒருவிஷயத்தையும் ஆக்கபூர்வமாக அணுக இயலாத மனநிலை கொண்டவராய் இருப்பர்.

இப்படிப்பட்ட மனிதர்களும் ஜோதிடத்தைப் பற்றி சில பல விஷயங்களை தெரிந்து வைத்திருப்பார்கள்.  ஆனால் தம்மிடம் ஜாதகம் பார்க்க வருகின்ற மனிதர்களிடம் எப்படி பேசுவது, நல்ல மற்றும் கெட்ட பலன்களை எவ்வாறு எடுத்துச் சொல்லுவது என்ற வழிமுறையெல்லாம் பார்க்கமாட்டார்கள்.  கெட்ட பலன் என்றால் அப்படியே சொல்ல வேண்டியது தானே.  இருப்பதை தானே சொல்லமுடியும். அதற்கு எதற்கு பூசி மெழுக வேண்டும். என்று எதிர் கேள்வி வேறு கேட்பார்கள்.  பரிகாரமா?  அதெல்லாம் ஒன்றும் கிடையாது?  பரிகாரம் செய்தால் பலன்களை மாற்ற முடியாது? இப்படியாக பலன்சொல்லும் மிகவும் புத்திசாலியான?! ஜோதிடர்களும் இருக்கத்தான் செய்கின்றனர்.

இப்படிப்பட்ட மனநிலைகொண்ட மனிதர்களிடம் பேசுவதும், பழகுவதுமே மிகவும் ஆபத்தான விஷயம்.  அவர்களிடம் போய் எனக்கு பலன்சொல்லுங்களேன்.  என்று தனது மற்றும் தனது குடும்பத்தாருடைய ஜாதகங்களையெல்லாம் எடுத்துக்கொண்டு நமது பிரச்சினைகளுக்கு தீர்வு கேட்டால் தலைவலி போய் திருகுவலி வந்த கதையாகிவிடும்.

பொதுவாக மனிதர்களிடம் மனநிலை என்னவென்றால் வாழ்க்கையில் பல வெற்றிகளையும், முயற்சிகளையும் உடைய மனிதர்கள் ஜோதிடம் என்றில்லை கடவுளை கூட நம்புவதற்கோ, வழிபடுவதற்கோ நேரம் இல்லாதவர்களைப்போல எப்போதும் அவர்கள் உண்டு அவர்கள் வேலை உண்டு என்று இருப்பார்கள்.  

அவர்களுக்கு ஒரு தோல்வி, ஒரு சறுக்கல் என்று வந்துவிட்டால் போதும் அவ்வளவுதான் ஒரேடியாக உட்கார்ந்துவிடுவார்கள்.  அவர்களுக்குடைய மனம் ஒருவித மாற்றத்தையும், நம்பிக்கையும் எதிர்பார்த்து அதற்கு ஏற்ற ஒரு சூழ்நிலையை தேடிக்கொண்டிருக்கும்.  அல்லது அவர்களது தோல்விகளுக்கு சரியான ஒரு காரணத்தை உணராமல் அல்லது அந்த காரணம் கிடைக்காத பட்சத்தில் அதற்கு வலுசேர்ப்பது போல் எந்த ஒரு விஷயம் கிடைத்தாலும் அதை அப்படியே கெட்டியாக பிடித்துக்கொள்ளும் மனநிலை கொண்டவர்களாக இருப்பார்கள்.

இனம் இனத்தோடு தான் சேரும்.  

வெற்றியாளர்கள் வெற்றியாளர்களையே விரும்புவர்.  தோல்வியாளர்கள் சக தோல்வியாளர்களுடன் இணைந்து தங்களது இயலாமையை, ஆற்றாமையை பகிர்ந்து கொள்வர்.

இது மனிதர்களிடம் பொதுவாக காணப்படும் ஒருவித மனோமனாநிலை எனலாம்.

சரி இப்படிப்பட்ட மனிதர்கள் தமக்கு ஒரு பிரச்சினை, கஷ்டம் என்று வந்த போது தான் ஜாதகத்தையே பார்க்க ஆரம்பிக்கின்றனர்.  நமது கஷ்டங்கள் எவ்வளவு காலம் நீடிக்கும்.  நமது பிரச்சனைகள் எப்போது தீரும் என்று தெரிந்து கொள்வதற்காகத்தான் ஜோதிடரிடம் செல்கின்றனர்.  அப்படிப்பட்ட மனநிலையில் இருக்கும், வாழ்வில் தோல்விகளாலும், துரோகங்களாலும் பாதிக்கப்பட்டிருக்கும் அந்த மனிதர்களுக்கு ஜோதிடர்கள் நல்ல மனோதிடத்தை சொல்ல வேண்டும் என்பதற்காக தான் ஜோ-”திடம்” என்ற பெயரை வைத்தனர் பெரியோர்கள்.

துன்பத்தில் வாடும் மனிதர்களுக்கு சரியான வழியை, திசையை காட்டி, நல்ல புத்தியை சொல்லவேண்டும் என்பதற்காகத்தான் திசை, புத்தி பலன்கள் என்று பெயரிட்டனர்.

ஆனால் இன்று நடைமுறையில் உள்ள ஜோதிடம் என்ன? அதன் பெயர் ”ஜோதிடம்” இல்லையாம் ”சோதிடமாம்”.  ஜோதிடத்தில் வடமொழி எழுத்து வருவதால் பார்ப்பனர்கள் நம்முடைய சோதிடத்தை மாற்றிவிட்டார்களாம்.  ஆரிய-திராவிட மோதல் என கதை இப்படி போகிறது.

உண்மையில் ஒரு விஷயத்தை சொல்லட்டுமா! தமிழும் சமஸ்கிருதமும் சமகால மொழிகள்.  பல சொற்களில் தமிழில் சமஸ்கிருதமும், சமஸ்கிருதத்தில் தமிழும் கலந்து இருப்பதை காணலாம். ஆதிகாலத்தில் இன்று இருப்பது போல பேப்பர், பேனா போன்ற வசதிகள் மிகவும் குறைவு.  எந்த ஒருவிஷயத்தையும் பதவுரை, விளக்கவுரை என்றெல்லாம் கதையளக்க முடியாது.  முடிந்தவரை எவ்வளவு சுருக்கமாக எழுத முடியுமோ அவ்வளவு சுருக்கமாக எழுத முயன்றார்கள்.

எனவே சமஸ்கிருதத்தில் சுருக்கமாக சுலோகங்களாக எழுதிவைத்தார்கள்.  சமஸ்கிருதத்தில் ஒரு ஸ்லோகத்திற்கு,  ஒருபக்கத்திற்கு, ஏன் 5 பக்கங்களுக்கு கூட தமிழில் விளக்கம் எழுதலாம்.  அவ்வளவு விஷயங்கள் அதில் அடங்கியிருக்கின்றது.  தமிழிலேயே குறள் போன்று செய்யுள் வடிவில் எழுதியதும் இந்த காரணத்தால் தான்.

என்ன ரூட் மாறிவிட்டேனா? எங்கே விட்டேன்....ஆங்....

இன்று நடைமுறையில் உள்ள ஜோதிடம் என்ன?

இன்று சோதிடம் அறியாத மக்களை பயமுறுத்தி பணம் பறிக்க போலிகளுக்கு பயன்படுபவை தோஷங்கள் என்றால் மிகையல்ல.  செவ்வாய் தோஷம், நாக தோஷம், புத்ர தோஷம், கெண்டம், செய்வினை என்று மக்களின் அறியாமையை பயன்படுத்தி அவர்களை பயமுறுத்தி தீட்டு தோஷம் கழிக்க, தகடு செய்ய என்று பலவழிகளில் பணம் பறிப்பது பல போலி ஜோதிடர்களின் பழக்க தோஷம் என்றாகிவிட்டது.

உண்மையில் பணத்திற்காக பார்த்து சொல்வது ஜோதிடமே அல்ல. அது வியாபாரம். ஜோதிடம் ஒரு தொழிலும் அல்ல.  எப்படி அரசியல் என்றால் சமூகத்திற்கு செய்யும் தொண்டோ அவ்வாறே ஜோதிடமும் மக்களுக்கு செய்யும் ஒரு தொண்டே.  ஆனாலும் அரசியலில் பதவியில் உள்ளவர்களுக்கு அரசாங்கம் ஊதியம் கொடுப்பது போல் தொடர்ந்து பலருடைய பிரச்சினைகளுக்கும் தீர்வு சொல்வதால் நாளடைவில் மக்களே தங்களால் இயன்ற சிறு தொகையை ஜோதிடரின் செலவினங்களுக்காக அளிக்கத்தொடங்கினர்.

ஆனால் அதுவே ஜோதிடர்களின் பேராசையாக மாறி மக்களிடம் பணம் பறிக்கும் அளவிற்கு சென்றுவிட்டதுதான் கொடுமை.  இன்னும் பல வி.ஐ.பி ஜோதிடர்கள் நாட்டில் இருக்கிறார்கள் அவர்களிடம் ஜாதகம் பார்க்க வேண்டுமென்றால் 10,000 முதல் 50,000 வரையெல்லாம் கட்டணம் வாங்குகிறார்கள். மக்களும் சென்று பார்த்துக்கொண்டுதான் இருக்கிறார்கள்.  இந்த கொடுமையை எங்கு போய் சொல்வது.  ”இருக்கிற மகராசன் அள்ளிமுடியறான் உனக்கேன் வலிக்குது என்கிறீர்களா?” அதுவும் சரிதான்.

என்னைப் பொருத்தவரையில் ஜோதிடராக இருப்பவர் தனது அறிவால், உடலால் தனக்கென வேறுதுறையில் ஒரு தொழிலை செய்துகொண்டே நேரம் கிடைக்கும் போதும் விடுமுறையிலும் தம்மிடம் வருவோர்க்கு பலன்கள் சொல்வதே சரியாகும். 

இல்லை முழுநேரமும் ஜோதிடம் பார்ப்பவராயிருந்தால் மக்கள் அவர்களால் முடிந்த சன்மானத்தை அளிக்கும் போது அதை ஏற்றுக்கொண்டு தமது பணியை தொடர்ந்து செய்துவர வேண்டும்.

இந்த இரண்டும் அல்லாமல் ஜோதிடம் பார்ப்பதற்கென இவ்வளவு கட்டணம் தரவேண்டும் பணம் கொடுத்தால் பலன் சொல்வேன் இல்லையென்றால் சொல்லும் பலனில் கைவைப்பேன் என்று பணத்திற்காக ஜோதிடம் சொல்பவர்களை என்னவென்று சொல்வது.  அரசியல் இன்று வியாபாரமாகி விட்டதைப் போல் ஜோதிடமும் பிஸினெஸ் ஆகிவிட்டது என்றுதான் சொல்ல வேண்டும்.

ஜோதிட சாஸ்திரம் தனது மரியாதையை இழக்கத் தொடங்கியதே இப்படிப்பட்ட செயல்களால் தான் என்றால் அது மிகையாகாது. மக்கள் மனதிலும் ஜோதிடத்தை பற்றியும் ஜோதிடர்களைப் பற்றியும் ஒருவித ஏளனமான மனநிலை ஏற்பட இப்படிப்பட்ட ஜோதிடர்களே காரணம்.  ஜோதிடம் மட்டுமல்ல பணத்திற்காக மட்டுமே செய்யப்படுகின்ற எந்த ஒரு செயலும் அதன் நோக்கத்தை நிச்சயம் நிறைவேற்றாது என்பது தான் உண்மை.  அதாவது ஜோதிடராகப்பட்டவர் பணத்தின் மீது பற்றுவைக்கக்கூடாது, தம்மை நம்பி வந்தவருக்கு வழிகாட்ட முயல வேண்டும் என்பது தான் இதில் அடங்கியிருக்கும் நீதி.

இந்த இடத்தில் மற்றுமொரு விஷயத்தையும் சொல்லியாக வேண்டும்.  ஒரு நல்ல விஷய ஞானமுள்ள ஜோதிடர் தமது பணியை கவனித்துக்கொண்டே ஓய்வு நேரத்தில் ஜோதிடம் பார்ப்பவராகவோ அல்லது முழுநேர ஜோதிடராகவோ இருந்துக்கொண்டு பிறருக்கு வழிகாட்டும் போது நம் மக்களின் குணத்தையும் இங்கே சொல்லியாக வேண்டும்.

பத்து ரூபாய் கொடுத்துவிட்டு குடும்பத்தில் உள்ள அத்தனை பேருடைய ஜாதகத்திற்கும் பலன் சொல்ல வேண்டும் என்று நீட்டுவார்கள்.  அதிலும் ஜோதிடரின் திறமையை சோதிப்பதற்காகவே வந்திருப்பார்கள்.  நோண்டி நோண்டி கேள்வி கேட்கும் அவர்களை திருப்திபடுத்துவதற்குள்ளாக போதும் என்றாகிவிடும் ஜோதிடருக்கு.

பொழுதுபோக்கிற்காக ஜோதிடம் பார்ப்பவர்கள் பலர் நம்மில் இருக்கிறார்கள்.  அவர்கள் வேலையென்னவென்றால் எங்கெல்லாம் யாரெல்லாம் ஜோதிடர் என்று தென்படுகிறாரோ அவரிடமெல்லாம் தமது ஜாதகத்தை காட்டி பலன் கேட்டுவிட துடிப்பார்கள். எனக்கு ஏகப்பட்ட யோகங்கள் இருக்கிறதாமே? நான் பெரிய ஆளாக வருவேனாமே? அவர் சொன்னார் நீங்களும் பார்த்து சொல்லுங்கள் என்பார்கள்.  நாம் மாற்றிசொன்னால் இவருக்கு ஜோதிடம் தெரியாது என்று முடிவு செய்துவிடுவார்கள்.

அப்படியானால் எப்போதெல்லாம் ஜாதகம் பார்க்க வேண்டும்.  எப்படிப்பட்ட ஜோதிடரை அணுகவேண்டும்.  பலன்களை அறிந்தபின்பு எப்படி நடந்துகொள்ள வேண்டும்.  போன்ற வினாக்கள் எழுவது இயல்பே. கீழே கொடுத்துள்ளதை பாருங்கள்.

1. ஒருவருக்கு வாழ்வில் திடீர் என நிகழும் துன்பங்கள், துயரங்கள் ஏற்படும் போதும்

2. தொடர்ந்து வரும் கடன்கள், பணம் மற்றும் மனம் சார்ந்த பிரச்சினைகள் போன்றவற்றால் பாதிக்கப்படும் போதும்,

3. தீராத வியாதிகள், நோய்கள், அடிக்கடி நிகழும் விபத்துகள் போன்ற உடல்சார்ந்த பிரச்சினைகளின் போதும்.

4. திருமணம், வீடு, நிலம், வாகனங்கள் விற்றல், வாங்குதல் போன்றவற்றில் ஏற்படும் பிரச்சினைகளின் போதும்.

5. வாழ்வில் நமக்கேற்றதொரு உயர்கல்வியை தேர்ந்தெடுக்கவும்

6. புதிதாக ஒரு தொழிலை பெரும் முதலீட்டில் தொடங்கும் போதும், வேலைவாயப்பிற்காகவும், மேற்கல்விக்காகவும் வெளிநாடுகளுக்கு செல்ல முயலும் போதும்.

7. எவ்வளவு முயன்றும் தாம் கற்ற கல்விக்கேற்ற நல்லதொரு வேலைவாய்புகள் கிடைப்பதில் தடை, தாமதங்கள் ஏற்படும் போதும்.

8. திருமணத்திற்குப் பிறகு குடும்பத்தில் ஒரு வாரிசு பிறப்பதில் தடை தாமங்கள் ஏற்பட்டாலும் அல்லது பிறந்த குழந்தையின் உடல் நலத்தில் அடிக்கடி குறைபாடுகள் ஏற்படுதல்.  குழந்தை பிறந்தவுடன் குடும்பத்தில் திடீரென ஏற்படும் மாற்றங்கள் போன்றவற்றிற்காகவும்

நமது ஜாதகத்தில் என்னபிரச்சினை என்றும் அதற்கு என்ன தீர்வு என ஒரு நல்லதொரு விஷய ஞானம் உள்ள ஜோதிடரை அனுகலாம். 

மேலே குறிப்பிட்டுள்ள காரணங்கள் போன்று நம் வாழ்வில் மிகமுக்கியமான சம்பவங்கள் மற்றும் நம் வாழ்வின் அவசியமான, முடிவெடுக்க முடியாத சந்தர்ப்பங்களின் போதும் நமது ஜாதகத்தைக் கொண்டு ஜோதிடரிடம் அணுகி அதற்கான தீர்வுகள், பரிகாரங்கள் இருப்பின் அவற்றையும் செய்து வரலாம்.  எவ்வளவு பரிகாரங்கள் செய்தும் மாற்றங்கள் ஏற்படவில்லையாயின் இறைவனின் மீது பாரத்தை போட்டுவிட்டு அமைதியாக காத்திருப்பதை தவிர வேறு வழியில்லை.

ஆற்றில் தேங்கியுள்ள அழுக்கு நீரானது வெள்ளம் வரும் போது அடித்துக்கொண்டு செல்வது போல நல்ல நேரமும், காலமும் வரும் போது நமது பிரச்சினைகள் தாமாகவே தீர்ந்துவிடும். கெட்டது என்று ஒன்று நிகழ்ந்தால் நல்லது என்று ஒன்று நிச்சயம் நிகழும். வாழ்க்கை சக்கரம் என்பதும் ஒருவித சுழற்ச்சிதான்.

இங்கு ஒரு விஷயம் முக்கியம் நாம் பொதுவில் யாருக்கும் எந்தவித தீங்கும் செய்யாமல் எப்போதும் போல் நமது கடமையை, முயற்சியை செய்து வரவேண்டும்.  எக்காரணத்தைக் கொண்டும் தவறான வழியில் வாழ்வில் முன்னேற முயலக்கூடாது.  உப்பு தின்றவன் தண்ணீர் குடித்தே ஆகவேண்டும். இது இயற்கையின் நியதி.

இந்த காரணங்கள் அல்லாது சும்மா எதற்கெடுத்தாலும் ஜாதகத்தை எடுத்துக்கொண்டு ஜோதிடர்கள் தோறும் சென்று குழப்பிக்கொண்டிருப்பதை தான் நாட்டில் இன்று பலரும் செய்துவருகின்றனர்.  அவர் அப்படி சொன்னார். இவர் இப்படி சொல்கிறார்.  யார் சொல்வது சரி, தவறு என்று புரியாமல் ஜோதிடத்தையும், ஜோதிடர்களையும் இகழ்வாக பேசுவது  தவறு.

பொதுவாக நாட்டில் நல்லதொரு ஜோதிடரை கண்டறிவது என்பது மிகவும் முதன்மையான பணி. 

மொழிநடையில் கூறியதையே திரும்ப கூறுவது குற்றம் என்றாலும் இந்த இடத்தில் அவசியம் கருதி மறுபடியும் மேலே எழுதியதை திரும்ப குறிப்பிடுகிறேன்.

”நல்ல ஜோதிடர் என்பவர் நல்லதொரு அறிவு, அனுபவம், சமயோசித புத்தி மற்றும் தம்மிடம் ஜோதிடம் கேட்க வருகின்ற மனிதரின் மனநிலை, குணாதிசியங்கள் போன்றவற்றை அவரது ஜாதகத்தின் வாயிலாக அறிந்து அவரது மனநிலைக்கு ஏற்றாற்போல் அவர் தாங்கும் திறனுக்கு ஏற்றாற்போல் அவருக்கு நடக்கும் பலாபலன்களை கூறுபவராக இருக்க வேண்டும்.  அதற்கு ஜோதிடரும் ஓரளவிற்கு பக்குவம் அடைந்தவராய், இறைபக்தி உடையவராய், நல்லதொரு பழக்கவழக்கங்களை கொண்டவராய் இருத்தல் அவசியம்.  நல்ல நேர்மறையான எண்ணங்களை உடைய மனிதராய் இருத்தல் மிக மிக அவசியம்”.

இத்தகைய குணங்களை கொண்ட ஜோதிடரை நாம் இருக்கும் பகுதியில் விசாரித்தால் நமக்கு தெரிந்துவிடும்.  எவர் எப்படி பலன் சொல்கிறார், அவர் கூறியவற்றில் எவ்வாறு பலன்கள் நடைபெற்றுள்ளது என்பதையெல்லாம் நாம் தான் விசாரித்து தெரிந்துகொள்ள வேண்டும்.  நல்லதொரு ஜோதிடரை கண்டறிந்தவர்கள் தேவையின்றி மற்ற ஜோதிடர்களிடம் சென்று அனைவரையும் சோதிக்க தேவையில்லை.

மனித வாழ்க்கை புதிர்கள் பல நிறைந்தது.  பல விடைதெரியாத மர்மங்களை கொண்டது.  ஜோதிடம் மட்டுமல்ல எதனாலும் சில, பல விஷயங்களுக்கு தீர்வே கிடைப்பதில்லை.  எனவே இருப்பதை கொண்டு நிறைவுடன் வாழ்ந்து நமது கடமைகளை நிறைவேற்றுதலே அறிவுடமை.

அடுத்த பதிவில் சந்திப்போம்.......

ஜோதிடமும் - மனிதர்களும் - ஓர் ஒப்பீடு

ஆதிகாலத்தில் வாழ்ந்த நமது முன்னோர்கள் கிரகங்களை வெறும் கண்களால் பார்க்கும் சக்திகளை பெற்றிருந்தார்கள்.  சமீபத்தில் நான் ஒரு வலைதளத்தில் ஒரு பதிவை படித்ததாக ஞாபகம், கல்தாமரை என்ற மூலிகை சதுரகிரியில் இருக்கிறது, அந்த அதிசய மூலிகையின் மேல் நின்று ஆகாயத்தை பார்த்தால் பகலில் கூட நட்சத்திரங்கள், நவகிரகங்கள் பளிச்சென நம் கண்களுக்குத் தெரியுமாம்.  அத்தகைய அறிவும், ஆற்றல்களையும், அனுபவங்களையும் நிரம்ப பெற்றவர்கள் நம் முன்னோர்களான தவமுனிவர்கள்.

நமது  முன்னோர்கள் வானில் உள்ள கிரகங்கள், நட்சத்திரங்கள் மற்றும் சூரிய, சந்திரர்களின் சஞ்சாரங்களை கொண்டு காலநிலைகளை கணக்கிட பயன்படுத்தி வந்துள்ளனர்.  ஜோதிடத்தின் ஆரம்பம் வான சாஸ்திரம் ஆகும். காலப்போக்கில் ஒரு குறிப்பிட்ட கிரக நிலையில் இருக்க பிறந்தவர்களின் வாழ்வில் ஏற்படும் பல்வேறு நிகழ்வுகளை கவனித்து  அவற்றை சேகரித்து ஒப்பிட்டு பார்க்க தொடங்கினார்கள்.  தங்களின் அனுபவத்தில் கிடைத்த தகவல்கள் பலவற்றையும் திரட்டி ஓலைச்சுவடிகளில் எழுதிவந்தனர்.  அந்த அடிப்படையில் தோன்றியதே ஜோதிடம் என்னும் அரிய கலையாகும்.

 

குறிப்பிட்ட காலகட்டத்தில் கிரகங்கள் அந்தந்த ராசிகளில் இருக்கப் பிறந்தவர்கள் இன்னின்ன பலன்களை அனுபவித்தனர்.  எனவே பிற்காலத்தில் அவ்வாறான கிரக அடைவுகளை பெற்று பிறந்தவர்களுக்கும் அத்தகைய பலாபலன்கள் ஏற்படலாம் என தங்களின் அனுபவத்தின் அடிப்படையில் கிரகங்களுக்கும், இராசிகளுக்கும் குணாதிசயங்களையும், இன்ன பிற இயல்புகளையும் நிர்ணயித்தனர்.

சரி இப்போது விஷயத்திற்கு வருவோம்.  ஜோதிடத்தில் முதன்மையான கிரகம் சூரியன் ஆகும்.  கிரகங்களுக்கு தலைவனாக இருக்கும் சூரியன் ஜோதிடத்தில் நெருப்பு கிரகமாக குறிப்பிடப்படுகிறது.  பிறந்த ஜாதகத்தில் சூரியன் ஆதிக்கம் அதிகமாக இருக்கப் பிறந்தவர்கள் உஷ்ண, பித்த தேகம் கொண்டவர்களாகவும்.  எந்த காரியத்தையும் கணகச்சிதமாக நிறைவேற்றக் கூடியவராகவும், நேர்மையான எண்ணம் கொண்டவர்களாகவும் இருப்பார்கள்.  சூடான உணவு பதார்த்தங்களை மிகவும் விரும்பி உண்ணக்கூடியவர்களாக இவர்கள் இருப்பார்கள்.

காட்டிற்கு ராஜா சிங்கம். கர்ஜிக்கும் சிங்கத்தின் குரலைக் கேட்டாலே மற்ற மிருகங்களுக்கு எல்லாம் உள்ளுக்குள் உதறல் எடுக்க ஆரம்பித்துவிடும்.  இயற்கையாகவே தலைமை தாங்கும் குணம் இயல்பாக அவர்களிடம் இருக்கும்.  சூரியன் ஆதிக்கம் பெற்ற பலரும் அத்தகைய குணங்களை பெற்றிருப்பினும் வெளியில் நாம் பார்க்கும் போது சாதாரண இயல்புடையவர்களாக தெரிவார்கள்.  ஆனால் மிக முக்கியமான நெருக்கடியான நிலை ஏற்படும் போதுதான் அவர்களின்  உண்மையான சுபாவம் நமக்கு தெரியவரும்.  

சூரியன் நல்ல நிலையில் அமைந்தவர்ககள் மிகவும் நேர்மையாகவும், ஒளிவு மறைவு இல்லாத, தன்னலமில்லாமல் வாழும் இயல்புடையவர்கள்.  தங்கள் கண்முன்னே நடக்கும் அநீதிகளை தட்டிக்கேட்க தயங்காதவர்கள்.  பொய், சூது, வாது. திருட்டு போன்ற தீயகுணங்களை அறவே வெறுப்பவர்கள்.  தங்களைப் போலவே மற்றவர்களும் வெளிப்படையாக இருக்க வேண்டும் என எதிர்பார்ப்பு அவர்களிடம் இருக்கும்.  இவர்களுக்கு கோபம் வரும்படி யாரும் நடந்து கொள்ளக்கூடாது. தவறி கோபம் வந்தால் வெடித்து சிதறிவிடுவார்கள்.  தங்கள் முன்னே எவ்வளவு பெரிய ஆளாக இருந்தாலும் தங்களது எதிர்ப்பை எவ்விதத்திலேயும் காட்ட துணிந்தவர்கள்.

12 இராசிகளில் சிம்ம லக்னம்  சூரியனின் ஆட்சிவீடாகும்.  மேற்கண்ட குணாதிசயங்கள் ஏறக்குறைய சிம்ம லக்னத்தில் பிறந்தவர்களுக்கும் அல்லது சிம்ம ராசியில் சந்திரன் இருக்கப் பிறந்தவர்களுக்கும் காணப்படும்.  மேலும் மற்ற லக்னங்களில் பிறந்திருந்தாலும் சூரியன் பிறந்த ஜாதகத்தில் நல்ல ஆதிபத்யம் பெற்று  ஆட்சி, உச்சம், நட்பு பெற்று  நல்ல நிலையில் அமைந்திக்க பிறந்தவர்கள் அனைவருக்கும் மேற்கண்ட சூரியனின் குணாதியங்கள் பெற்றிருப்பர்.

அரசியலில் நம்மை வழிநடத்தும்  பலரும் சூரியன் நல்ல நிலையில் இருக்க பிறந்தவர்களே ஆவர்.  நேர்மையற்ற அரசியல் தலைவர்களுக்கு சூரியன் தீய கிரகங்களின் பார்வை அல்லது சேர்க்கை பெற்று வலிமையுடன் இருப்பார்.  சூரியன் நல்ல நிலையில் இருக்கப்பிறந்தவர்கள் ஆயிரம் பேர் கொண்ட கூட்டத்தில் கூட தனித்து தெரிவார்கள் அவர்களது முகம் பிரகாசமாகவும், மிகவும் செயல்திறன் கொண்டவர்களாகவும் இருப்பர்.  அவர்களை ஆயிரத்தில் ஒருவன் என்று கூறலாம்.  அரசனாக வாழ்பவர்கள் அல்லது அரசனுக்கு ஒப்பானவர்கள் இவர்கள். தற்காலத்தில் அரசு பதவியில் உள்ளவர்கள் அனைவருக்கும் ஏதேனும் ஒருவகையில் சூரியன் வலுப்பெற்றிருப்பதை அவர்களது ஜாதகத்தில் காணலாம்.  தந்தையின் அன்பை பெற்றவர்கள் தந்தைவழி அனுகூலமும் அவர்களுக்கு உண்டு.

ஜாதக்த்தில் சூரியன் வலிமை குன்றி இருந்தால் அவர் ஆளுமைத்திறன் கொண்டவராக இருக்க முடியாது. மேலும் அவர்களுக்கு உடலில் உஷ்ண கோளாறுகள் ஏற்படும்.  கண்களில் ஒளிக்கு காரணம் சூரியனும் சந்திரனும் ஆவார்கள் என ஜோதிடம் குறிப்பிடுகிறது.  எனவே சூரியன் பாதிப்படைந்த நிலையில் பிறந்தவர்கள் கண்களில் குறைபாடுகள் உள்ளவர்களாக இருப்பர்.  சூரியன் நமது குடும்பத்தில் தந்தைக்கு காரகம் வகிப்பவர்.  எனவே தந்தை வழி உறவுகள் பாதிப்படையும் பலருக்கு தந்தையை பிரிந்தோ அல்லது தந்தை உயிருடன் இல்லாமலோ உள்ள நிலை ஏற்படும்.

சூரியனுக்கு உகந்த தானியம் கோதுமை.  பஞ்ச பூதங்களில் சூரியன் நெருப்பை குறிக்கிறார்.  சிலரைப் பார்த்தால் நல்ல  பளபளப்பான வழுக்கை தலையுடன் பெரிய மனிதரைப் போல இருப்பார்கள் அவர்க்கெல்லாம் ஜாதகத்தில சூரியன் வலுவாக இருக்கும் சூரியன் தலை மயிரை குறிப்பவர்.  உடல் உஷ்ணத்தால் தலையில் உள்ள மயிர்களலெல்லாம் கொட்டிவிடும். 

சூரியனுக்கு உகந்த நிறம் ஆரஞ்சு நிறமாகும்.  நவரத்தினங்களில் மாணிக்க கல் சூரியனுக்கு மிகவும் உகந்தது (கல்லெல்லாம் மாணிக்க கல்லாகுமா என்ற பாடல் நினைவுக்கு வருகிறதா!!).  எண்கணிதத்தில் முதல் எண்ணாகிய எண் 1 சூரியனுக்குரிய எண்ணாக குறிப்பிடப்படுகிறது.  கடவுள்களில் முதன்மையான சிவன் சூரியனுக்குரிய அதிதேவதையாக உள்ளார்.   27 நட்சத்திரங்களில் கார்த்திகை, உத்திரம்,  பூராடம் சூரியனின் நட்சத்திரங்களாக குறிப்பிடப்படுகிறது.

அரிது அரிது மானிடராக பிறத்தல் அரிது என்றார் ஔவையார்.  

நான் இங்கு சொல்ல வருவது என்னவென்றால் அரிது அரிது சூரியன் வலுவாக நல்ல நிலையில் உள்ள மனிதர்களாக பிறத்தல் அரிது.   ஏனென்றால் கடமை, கண்ணியம், கட்டுப்பாடு, உண்மை, நேர்மை இவற்றிற்கெல்லாம் அதிபதியான சூரியனின் ஆதிக்கத்தில் பிறந்த ஆண்மை மிக்க ஒரு தலைவன் நமக்கு அமையாமல் இருப்பதால் தான் நாம் முதுகெலும்பற்ற மனித புழுக்களாக, லஞ்சம், ஊழல் என்ற சாக்கடையில் எல்லாவற்றையும் சகித்துக் கொண்டு வாழ வேண்டியதாகிறது.  

தர்மத்தின் வாழ்வுதனை சூது கவ்வும், தருமம் மறுபடியும் வெல்லும் என்ற  பாரதியின் பாஞ்சாலி சபதம் பாடல் நினைவுக்கு வருகிறது.  நிச்சயம் நமக்கெல்லாம் ஒரு விடிவு காலம் பிறக்கும்.  நமது முன்னாள் குடியரசுத் தலைவர் திரு. அப்துல்கலாம் அவர்கள் குறிப்பிட்டபடி நம் தாய்நாடு விரைவில் வல்லரசாக மாறும்.  சூரியனின் ஆதிக்கம் பெற்ற அந்த ஆதிசிவனே மனிதனாக நிச்சயம் இந்த பூவுலகில் அவதரித்து நம்மையெல்லாம் வழிநடத்த வேண்டும்.  மீண்டும் இந்த பூவுலகில் ராமராஜ்யம் விரைவில் அமைய வேண்டும் என்று நாம் அனைவரும் தினமும்  இறைவனை பிரார்திப்போம்.

அடுத்த பதிவில் சந்திப்போம்

சு. மணிகண்டன்.