உள்குத்துக்கும் உள்ளாட்சி தேர்தலுக்கும் என்ன சம்பந்தம்?..

ஒரு வழியாக உள்ளாட்சி தேர்தலுக்கான தேர்தல் அறிவிப்புகளும், கூட்டணிக் குழப்பங்களும் முடிவிற்கு வந்துவிட்டன.  7 முனைப்போட்டியாம்.  எந்த முனைக்கு வெற்றிவாய்ப்பு கிடைக்கும்? அலசுவோமா?

அரசியலில் நிரந்தர நண்பனும் கிடையாது நிரந்தர பகைவனும் கிடையாது என்றொரு அடைமொழி சொல்லப்படுவதுண்டு.  இது எதற்கென்றால் யார் வேண்டுமானாலும், யாருடன் வேண்டுமானாலும், எப்போது வேண்டுமானாலும் கொள்(ளை)கை அடிப்படையில் கூட்டணி அமைக்கத்தான்.

அந்த அடிப்படையில் தான் இதுவரையிலான தமிழக அரசியல் வரலாற்றில் கூட்டணிகள் அமைக்கப்பட்டு வந்திருக்கின்றன.  ஆனால் தமிழக அரசியல் வரலாற்றிலேயே முதல்முறையாக அரசியலுக்கு வந்து சில நாட்களே ஆன கட்சிகள் கூட தனித்து நின்று தேர்தலை சந்திக்க துணிந்திருக்கிறது என்றால் என்ன பொருள்? அவர்களுக்கு வேறு வழியில்லை.  மேலும்  நடக்க இருப்பது வெறும் உள்ளாட்சி தேர்தல் மட்டுமே இதில் நம் பலத்தை சோதித்துக்கொண்டால் வரக்கூடிய நாடாளுமன்ற தேர்தலுக்கு பெரிய கட்சிகளுடன் பேரம் பேசி தேவையான சீட்டுகளை பெற்றுக்கொள்ள வசதியாக இருக்கும் என்ற கணக்கு தான்.

நடந்து முடிந்த சட்டசபை தேர்தலில் ஏற்பட்ட ஜெயா, விஜயகாந்த் கூட்டணியால் யாருக்கு லாபம் என்று பார்ப்பதை விட கலைஞர் மீண்டும் ஜெயித்து வந்துவிடக்கூடாது என்பதில் இருவருமே ஒற்றுமையாக இருந்ததால் கூட்டணி அமைத்தார்கள்.

தொடர் தோல்விகளால் துவண்டிருந்த ஜெயாவிற்கு விஜயகாந்த் உடனான கூட்டணி ஒரு தெம்பை அளித்தது எனலாம்.  ஆனால் பதவிக்கு வந்தவுடன் இனி யாரும் நம்மை அசைக்க முடியாது என்ற எண்ணமும் (முன்பு பதவியில் இருந்தவர்களும் இப்படிதான் நம்பினார்கள் பாவம் அவர்களின் நம்பிக்கை பொய்க்க கூடாது), நாமே விஜயகாந்தை மேலும் மேலும் வளர்த்து பெரிய ஆளாக்கிவிடக் கூடாது என்ற அரசியல் சாதுர்யமுமே ஜெயா தனித்து நிற்க காரணமாக இருந்திருக்கிறது.

எதிர்முகாமில் திமுக, காங்கிரஸ் கூட்டணிகள் உடைந்துவிட்டது என்பதைவிட கலைஞரின் அரசியல் சாதுர்யத்தால் காங்கிரசை சாயம் வெளுக்க வைக்க இது தான் சரியான சந்தர்ப்பம் என நினைத்தும், கனிமொழி கைதுக்கு அவர் மனதில் இருந்த நெருடலுக்கு ஆறுதலும் தேடிக்கொண்டுள்ளார்.  தோல்விகள் கலைஞருக்கு புதிதல்ல.  மேலும் இப்போது இருக்கின்ற நிலையில் அவர்களால் உடனடியாக மீண்டெழ முடியாத நிலை. இதுவே நாடாளுமன்ற தேர்தலாக இருக்கும்பட்சத்தில் இவ்வாறு கழற்றிவிட முயன்றிருப்பாரா என்பது யோசிக்க வேண்டிய விஷயம்.

கம்யூனிஸ்ட்கள் கிடைத்தவரை லாபம் என நினைத்து விஜயகாந்த் உடன் கூட்டணி வைத்திருக்கிறார்கள்.  விஜயகாந்த் இந்த வாய்ப்பை சரியாக பயன்படுத்திக் கொள்வதுடன் இனி வரும் தேர்தலில் இதே வழிமுறையை கையாண்டால் நிச்சயம் தமிழகத்தில் ஒரு மாற்று அணி உருவாக வாய்ப்பு ஏற்படும். ஒரே ஒரு விஷயத்தில் மட்டும் அவர் விழிப்புடன் இருக்க வேண்டும்.  அது என்னவெனில் எந்த காரணத்தை கொண்டும் முழ்குகின்ற காங்கிரஸ் உடன் அவர் கூட்டணி வைத்துவிடக் கூடாது.  அவ்வாறு அவர் அணி அமைத்தால் நிச்சயம் அவர் தமிழக அரசியலில் தவிர்க்க முடியாத சக்தியாக உருவெடுத்து விடுவார் என்பது நிச்சயம்.

ஜெயா தான் இந்த பொன்னான வாய்ப்பை விஜயகாந்திற்கு ஏற்படுத்தி கொடுத்தார். அனேகமாக ஜெயா செய்யும் இரண்டாவது அரசியல் சறுக்கலாக இந்த விஷயம் இருக்கும்.

நடக்க இருக்கின்ற உள்ளாட்சி தேர்தலில் அந்தந்த பகுதிகளில் செல்வாக்காக உள்ள நபர்கள் சுயேட்சையாக நின்றால் கூட வென்றுவிடக் கூடிய சாத்தியக்கூறுகள் இருக்கின்றது. அந்தந்த பகுதிகளின் பிரச்சினைகளை பொருத்தே வெற்றியும் தோல்வியும் அடங்கியிருக்கிறது.  எனவே இங்கு அரசியல் கூட்டணிகள் என்பதெல்லாம் தேவையற்றது என்பதே கட்சிகளின் எண்ணமாக இருக்க முடியும்.

திமுக-வில் முக்கிய புள்ளிகள் அனைவரும் சிறையில் இருக்கின்றனர்.  மேலும் எந்நேரமும் வழக்கு பாயலாம் என்ற பயத்தில் இருப்பவர்களும் தேர்தல் பணி செய்ய தயங்கும் நிலை உள்ளது.  அதிமுகவோ இலவசத் திட்டங்களின் மூலம் எளிதாக மக்களின் ஓட்டுகளை பெற்றுவிடலாம் என்று கணக்கு போடுகிறது.  அவர்களின் திட்டம் முழுவதும் நிறைவேறுவதும் சந்தேகமே!  ஏனெனில் கலைஞர் ஆட்சியில் அனைவருக்கும் வண்ணத் தொலைகாட்சி பெட்டி கிடைத்தது போல் ஜெயா ஆட்சியில் இலவசங்கள் கிடைக்காது என பெரும்பாலான மக்களுக்கு தெரிந்தே இருக்கிறது.

விஜயகாந்த் கடுமையாக உழைத்தால் சில இடங்களில் வெற்றிக்கொடி நாட்டலாம்.  ஆனால் ஒருவேளை உள்ளாட்சி தேர்தலில் விஜயகாந்த் கணிசமான இடங்களில் வென்றால் எக்காரணத்தை கொண்டும் மீண்டும் அதிமுக அணிக்கு செல்லக்கூடாது.  அப்படி சென்றால் மக்களின் நம்பிக்கையை அவர் இழந்துவிடுவார்.  பாஜக உடன் கூட்டணி வைத்தாலும் கூட நல்லது எக்காரணத்தை கொண்டும் காங்கிரஸ்காரர்களுடன் மூழ்கும் படகில் ஏறவே கூடாது.  இவற்றை அவர் தொடரந்து பின்பற்றினால் நாடாளுமன்றத்தில் தேமுதிக நுழையும் வாய்ப்பை விரைவில் பெற வாய்ப்புகள் இருக்கிறது.

பொறுத்திருப்போம்.

ஜோதிடம் பற்றிய சில கருத்துகள் - பாகம் 2

         அனைவருக்கும் வணக்கம் சென்ற பதிவில் ஜோதிடம் குறித்த சில கருத்துக்களை கூறியிருந்தேன்.  ஜோதிடமானது நமது விதியமைப்பை தெரிந்து கொள்ள உதவுகிறது.  நாம் சென்ற பிறவியில் செய்த பாவ புண்ணியங்களுக்கேற்ப நமது ஜாதகத்தில் கிரக அமைப்புகள் இப்பிறவியில் அமைகிறது.  இப்பிறவியில் செல்வந்தர் வீட்டில் பிறந்து இன்பமாக வாழ்வதும், ஏழையின் வீட்டில் பிறந்து இளமையில் துன்பத்தை அனுபவிப்பதும் நமது வினைப் பயன்களின் விளைவால் ஏற்படுவதே அகும்.

    உயிரினங்களில் மனிதனுக்கு மட்டுமே பாவ புண்ணியங்கள் ஏற்படுகின்றன. பிற உயிரினங்கள் அனைத்தும் இயற்கையோடு இயைந்த வாழ்க்கையை வாழ்கின்றன.  எனவே அத்தகைய உயிரினங்களால் இயற்கையில் எத்தகைய மாற்றமும், விளைவும் ஏற்படுவதில்லை.  ஆனால் மனிதன் மட்மே இயற்கையை தனது விருப்பத்திற்கேற்றாற் போல் மாற்றி வாழ முற்படுகின்றான்.  அதனால் அவன் பல செயல்களை இயற்கையை மாற்றி செயல்பட துவங்குகின்றான்.  இதன் விளைவாகவே அவனது செயல்களுக்கு ஏற்ற பலன்களை அவன் பெறுகின்றான்.

            நியூட்டனின் மூன்றாவது விதியை நாம் அனைவரும்  பள்ளிப் பாடத்தில் படித்திருப்போம். அது ‘எந்த வினைக்கும் எதிர் வினை உண்டு’ என்பதாம்.  நன்மை செய்தால் பிற வகைகளில் நன்மைகள் நம்மை தேடி வரும்.  அதுவே தீமை செய்தால் பிற வழிகளில் தீமையான பலன்களே நம்மை வந்தடையும்.

           ஜாதகத்தில் 5, 9 ம் இடங்கள் நாம் முற்பிறவியில் செய்த வினைகளுக்கு இப்பிறவியில் நாம் அடையப்போகும் பலன்களை எடுத்து கூறும் இடமாகும்.  நமது மொத்த ஜாதகமுமே நாம் செய்த வினைகளுக்கு ஏற்றவாறு தான் பலா பலன்களை நமக்கு தரும்.

           நாம் நமது ஜாதகத்தின் மூலம் நமது கர்ம வினைகளை தெரிந்து கொள்கிறோம்.  ஆனால் நமக்கு எப்போது யோகம் வரும், நமது தீமைகள் எப்போது நம்மை விட்டு அகலும்.  நான் பணக்காரனாக ஆவேனா.  கார்,  பங்களா வாங்குவேனா.  எனக்கு நல்ல வேலை எப்போது கிடைக்கும், திருமணம் எப்போது ஆகும்.  எனக்கு ஏன் இந்த நோய் வந்தது, அது எப்போது தீரும். கடன் எப்போது தீரும்.  பகை எப்போது அகலும் போன்ற பல வினாக்களை எழுப்பி ஜோதிடர் நமக்கு சாதகமாக பலன்களை சொல்லுவாரா என்று பார்க்கின்றோம்.  ஜோதிடரும் தனக்கு தெரிந்த வகையில் ஜாதகத்தை அலசி உங்கள் வினாக்களுக்கு தகுந்த விடையை தருகிறார்.  அது நீங்கள் எதிர்பார்க்கும் விதத்தில் இருந்தால் மகிழ்ச்சியையும் இல்லாவிட்டால் வருத்தமும், ஜோதிடத்தின்பால் அவநம்பிக்கையும் ஏற்படுகிறது.

          உண்மையில் நாம் எப்போதும் பிறர்க்கு உதவும் வகையில் நமது வாழ்க்கை முறையை மாற்றிக்கொள்ள வேண்டும்.  நம்மால் முடிந்த உதவிகளை பிறர்க்கு செய்து கொண்டே இருக்க வேண்டும்.  பலன் கருதி எந்த செயலையும் செய்யக் கூடாது.  பலன் ஏற்பட்டாலும் அதன் மீது பற்று ஏற்படக்கூடாது.  நாம் நமது கடமையை செய்து கொண்டே இருக்கவேண்டும்.  

             இன்றைய உலகில் எதற்கெடுத்தாலும் லஞ்சம் பெறுவது, கொடுப்பது என்பது சமுதாயத்தில் பழகிபோய்விட்ட ஒன்றாகும்.  லஞ்சம் நமது பாவ மூட்டையை மேலும் அதிகமாக்குமே ஒழிய வேறு எந்த நன்மையும் அதனால் இல்லை.  எந்த பணியையும் பலன்கருதாது செய்ய பழகிகொள்ள வேண்டும் அது அலுவலகப் பணியாயினும் சரி, சமுதாய பணியாயினும் சரி.  அதனையே அப்பர் பெருமகான் ‘என் கடன் பணிசெய்து கிடப்பதேயல்லாமல் வேறறொன்றறியேன் பராபரமே’ எனப் பாடியுள்ளார்.   

              முடிந்தவரை நாம் எளிமையாக வாழ பழகிக் கொள்ளவேண்டும்.  தேவையற்ற ஆடம்பரங்களுக்கு ஆசைப்பட கூடாது.  கோயில்களில் ஏற்பாடு செய்யப்படும் அன்னதானம் மற்றும் ஊருக்கு பொதுவாக செய்யப்படும் காரியங்களில் நாம் நம்மை ஈடுபடுத்திக் கொண்டு பலன் கருதாமல் உழைக்க வேண்டும்.  இப்படி செய்வதின் மூலம் நமது கர்ம வினைகள் பெருமளவு கரைந்துவிடும்.

             நம்மிடம் வசதிகள் இருப்பின் ஏழைக் குழந்தைகளுக்கு படிக்க, உண்ண, உடுக்க வசதிகளை நாம் செய்து தரவேண்டும்.  அவை நமது வறுமையை போக்கும், எந்த நிலையிலும் நமக்கு ஆகாரம் கிடைக்கும் வழியாகும்.  அவ்வப்பொழுது சிறைச்சாலை, மருத்துவமனைகளுக்கு சென்று அங்கு துன்பப்படுபவர்களுக்கு நம்மால் இயன்ற உதவிகளை செய்யலாம்.  ஏனெனில் நமது ஜாதகத்தில் ஏதோ ஒருவகையில் மருத்துவமனையில் இருக்க வேண்டிய காலம் வரும் அப்போது நாம் இயல்பாக செய்து வந்த செயலினால் அந்த கர்ம வினையானது கழிந்து போக வாய்ப்புண்டு.  அவ்வாறே சிறைசாலைக்கும் பொருந்தும்.  அவ்வபொழுது அவசியம் ஏற்பட்டால் இரத்த தானம் செய்யவதும்; விபத்துகள் ஏற்படும் நிலை நமது ஜாதகத்தில் இருந்தால் அவை நமக்கு அதிக பாதிப்பை தராது.  

             இவையெல்லாம் நடைமுறை வாழ்வில் இயல்பான முறையில் செய்யும் பரிகாரங்களாகும்.  இதனால் நமது பாவ வினைகள் கழிவதோடு மட்டுமல்லாமல் பல புண்ணிய செயல்களுக்கு வித்திடுவதாக அமையும்.

              நாம் உடலால் உள்ளத்தால் பிறர்க்கு செய்யும் நன்மைகளே நமது கர்ம வினைகளை நாம் அனுபவித்து கழிக்கும் வழியாகும். இதனால் தான் நம் முன்னோர்கள் ஆலயங்களை எழுப்பி அதன் மூலம் பல நல்ல காரியங்களை செய்ய நம்மை வழிநடத்தி வந்திருக்கின்றனர்.  ஆனால் நாம் தான் பகுத்தறிவு என்றும் மூடநம்பிக்கை என்றும் அவற்றையெல்லாம் புரிந்து கொள்ளாமல் விலகி வாழ்ந்திருக்கிறோம்.

            அடுத்த பதிவில் சந்திப்போம். நன்றி, வணக்கம்.